1449.04.07.

Mynen willigen denst touoren.

Ersamen leuen heren vnd bisundern guden frunde.

Alse gij my der Ersamen heren, des rades to Lubeke, vnd radessendeboden van Hamborgh breff vppe myn antwerde van der visscherige wegen, dat ik jw latest schreff, hebben getoghet laten, darinne se van der van Lubeke amptlude wegen to Rijbenborg, de se ver sik gehat hebben, schriuen, dat sik desuluen sodanner vntuchtigen myner schrifte mit vntuchtliken antworden sik darup woll geborende nu to tijd entholden vnd dat lijden laten willen etc.:

Darup, leuen heren, iß myn antworde, dat darmede, alse ik de warheid, de ik, wanner dat tijd vnd stede esschen, woll gedencke natobringende, hebbe gescreuen, hope ik, dat ik dar nicht vntuchtigen anne gescreuen efte gedan hebbe, so ik dat ok nu late stan vnd furder nicht will vorantwerden. Vnd alse se denne furder schriuen, wes in bescherminge erer vorscreuen watere vnd visscherige gesceen sij, dat sij gescheen mit ereme wetende vnde willen, mehnende, dat se dat mit redelicheid vnd billiken don moghen etc.; iß myn antworde, dat de vndersaten des slotes Winssen bij der Elue beseten vnd ok ere vorfaren de vorscreuen visscherige in rouwelken werden gehatt, mit rechte beseten vnd der ok gebruket hebben ane jemandes rechte weddersprake so lange, dat des nemand anders en dencket wente an desse der van Lubeke amptlude to Rijbenborg welichliken ouerfaringe, de ik vaken vor one vnd ok jw beclaget vnd dat to der rechten kuntschup to komende geboden vnd begheret hebbe, dar id my ny tokomen mochte; mit watte redelicheid se denne eyn sodanne schriuen vnd don laten, konne gij vnd eyn jowelik redelik man woll irkennen.

Vnd alse int leste begheren, mit my to bestellende bij den mynen, dat alle dingk gutliken sta, solanghe dat se vnd gij darumme tosamnede komen, vnd dat des slotes to Winsen vndersaten den sor, den se vangen, ereme amptmanne to Rijbenborg vppantwerden, so sik dat gebore etc.: lleuen heren, dat sik dat also gebore, ensta ik van des vorbenomeden slotes wegen one nicht tho, ok en verdencke ik mik nicht, dat de juwe mit den van Lubeke binnen erer stad vmme de visscherige dar also van gescheden syn vnd dat hebben angenamed, dat men den stor, den des slotes to Winssen vndersaten vangen, ereme amptmanne to Rijbenborgh vppantwerden scholle.

Sunder, leuen heren, konde gij de van Lubeke vnderwijsen, dat se ore amptlude to Rijbenborg alse hedden, dat se my vor sodanne gewald vnd ouerfall an dessuluen slotes vndersaten beghan souele don wolden, alse ik in rechte darvor eeghe, so ik jw dat vaken geelaget hebbe, wolde ik gerne vmme jw verdenen, wente ik se darmede nicht lengk dencke laten to besittende. Gode almechtich sijt beuolen to langen zaligen tijden.

Screuen vnder mynen ingesegel, am mondage na deme Palmsondaghe, anno Domini etc. XLIX.

Juwer ersamheide willighe