1449.04.02.

Vnsen fruntliken grud vnde wes wy gudes vormogen touorn.

Ersamen heren, besundern guden vrunde.

Als wij juw vnlanges gescreuen hebben van sodanner walt, de vnsen vndersaten in der vogedie to der Ribenborch wonafftich vppe der Elue an vnsen watere vnde gebede van juwen vndersaten in der vogedie to Winsen beseten in der vischerie is geschen vnde beyegend, alse vnse van der wegene juw gesant eghendliker inneholdende vthwiseden, worvppe gij vns juwe antwerde myt ener ingeslotenen auescrifft enes breues des erbaren hern Albertes van der Molen, medekumpans juwes rades, amptmans to Winsen, hebben benalet, in welker auescrifft desulue hern Albert van der Molen beroret, wes de jenne, de nu tor tijd de Ribenborch innehebben, vns darven vorgebracht hebben, darane hebben se de warheit gespart vnde vns des vnrechte berichtet vnde villichte gerne seghen, dat van der wegene vnwille twisschen den steden erstunde etc., hebbe wij mit mer worden an sodannen breuen vnde scrifften begrepen wol vornommen.

Also do wij juwen ersamheyden fruntliken weten, dat wij sodanne juwe vnde her Albertes van der Molen breue vnde scriffte den ghennen, de nu to tijd Ribenborch inne hebben, lesen laten hebben, worupp se vns hebben geantwerdet, dat se zijk in sodannen vntuchliken antworde, sle zijk doch vppe des ergenanten hern Albertes van der Molen vntuchtlike scriffte wol geborde, nu to tijd entholden vnde dat liden laten willen, men wes se vns van der legenheit der vorscreuenen schicht vnde walt vnderwiset hebben, menen se in warheit redelikien vnde wol, wannere dat stede vnde tijd esschen, to vorantwerende.

Vortmer, alse de sulue her Albert van der Molen scrifft, dat de ghenne, de vns sulkent anghebracht hebben, villichte gerne seghen, dat twisschen vns steden vnwille darvan erstunde etc.: guden vrunde, wes in beschermynge vnser vorscreuen watere vnde visscheri geschen is, dat is geschen myt vnsem wetende vnde willen; vnde vormoden vns, dat de erbenomede her Albert van der Molen vns so vnwetende nicht en kenne, dat wij jemande hinder vnde schade vnredeliken totheen vnde dorch de vnsen gerne don laten wolden, dar zijk dat billichliken nicht geborde, wowol he doch de syne darto herdet vnde hold, dat se vnse vorscreuenen watere myt wolt vnde vreuelle bevisschen. Nicht myn vmme vnwillen to vormidende, de hijr lichte vurder van komen vnde vpstan mochte, is noch vnse vruntlike begeringhe, dat gij myt dem ergenanten hern Alberte van der Molen bestellen, de sine also to hebbende vnde to vermogende, gelijk wij de vnse weddervmme hebben vnde vormoghen willen, dat alle dingk gudliken deshaluen bestande bliue, solanghe dat gij vnde wij darvmme tosamende komende werden, vnde dat ok de insetene der vogedie to Winsen, wes se van storen vanghen, vnsem aptmanne to Ribenborch, alse zijk dat ok gebort, vpantwerden vnde den vnsen nenen hinder don in erer visscherye. Schege it auer van en hijr enbouene, so moste wij darbij don vnde vortfaren, alse wij juw vorhenne gescreuen hebben. Hijrvan begere wij juwe bescreuene antwerde bij dessem boden.

Gode dem heren zijt beualen.

Screuen vnder der stad Lubeke secret, des wij nu to tijd samentliken bruken, an deme Mydweken vor Palmen, anno etc. XLIX.

De rad to Lubeke vnde radessendeboden der stad Hamborch, nu tor tijd to Lubeke to daghe vorgaddert.