1449.03.12.

Vnsen fruntliken grud vnde wes wij gudes vormogen touorn.

Ersamen heren, guden vrunde.

Wij begeren juw weten, dat vns van den vnsen, de van vnser wegen Rybenborch inne hebben, klegeliken vorebracht is worden, wo dat, alse juwe sendeboden neghest van Lubeke sin gereden, juwe vndersaten, de Ouereluesschen, qemen wol myt sesteyn schepen to der Wullenborch vnde dreuen de vnse dar aff vnde se qwemen des anderen daghes to Eysslinge myt aller macht myt speten vnde myt armborsten, vnde hadden ok liggende lude vpp deme Houlande myt were, vnde wolden de vnse dar toslagen hebben. Sollike gewalt dreuen se, sedder dat her Albert van der Molen hijr van Lubeke is gescheden, des wij vns na deme aueschedende juwer sendeboden, de hijr bij vns to daghe weren, jo nicht vermodet en hadde vnde solliker walt vnbesorget sin gewesen etc.

Begere wij van juw, dat gij myt den juwen bestellen vnde se also hebben, dat se vns vnde den vnsen solliker walt mer vorkesen, vnde dat vns, vnsen vrunden van Hamborch vnde den vnsen vor de walt vnuortoghert wandel vnde lijk beschee. Men, wor des nicht en beschut, dat en kunde wij unde vnse vrundes van Hamborch nicht mede lyden, men wy mosten so vele wapender lude to harnesche myt vnser were dar entegen voghen, solliker walt to sturende, alse des nod vnde behoff were. Wat vnwille vnde twidracht denne twisschen vns steden darvan errisen vnde erwecket mochte werden, kone gij suluen wol erkennen. Hijraff begere wij juwe bescreuen antwerde.

Screuen vnder vnseme secrete, des Mydwekens na deme Sondage, alsemen in der hilgen kercken singet Reminiscere, anno etc. XLIX.

Consules Lubicenses.

[Aufschrift:] Den - radmannen to Luneborch, vnsen u.s.w.

[Vom Rat von Lüneburg ist unter dem Brief vermerkt: ] Responsum, als men bij de breue mit der copien hern Alberdes antwordes plecht ot schriuende, mit desser clausulen: Also, leuen vrunde, angesehn de redelicheid synes antwerdes, dat he also mit warheit mehnet antobringende, dar des not iß, so mehen wij, dat gij gik des so ernstliken nicht annemen noch jenige wepener jegen de vnse leggen edder darvor wandel van den vnsen forderen doruen, wente wij hern Albertes to eren vnd to rechte mechtich sind. Valeatis.