1449.03.12.a.
Hamburgensis.
Post salutacionem.
Ersamen heren, leuen vrunde, wy begeren jw weten, dat vns van den vndsen, de nu Rybenborch innehebben, clegeliken is vorebracht, wo der van Luneborch vndersaten in der vogedye to Wynsen, alse de Quereluesschen, alse der van Luneborch sendeboden hir van Lubeke sin gereden, qwemen mit sestein schepen to der Wullenborch vnde dreuen de vnsen daraff; vnde se qwemen des andern dages to Eyßlingen mit aller macht, mit speten vnde mit armborsten vnde hadden ok lyggende lude vppe deme Haulande mit were vnde wolden de vnse dar toslagen hebben. Sollike gewalt dreuen se sedder dat her Albert van der Molen hir van Lubeke is gescheden etc.
Leuen heren vnde vrunde, hirvmme scriue wy nu an de van Luneborch, so gy vernemen mogen inder Vscriffte hirane vorwaret etc.
Begere wy van juwen leuen fruntliken vnde bidden, efft jw geleuet, dat gy an de van Luneborch vp juwe vorbeteren hirvmme ok willet verscryuen, vp dat gy, wy vnde de vnse by vnsen vryheyden vnd rechticheiden mogen liuen. Vnde were ok bouen vermodende, dat se sollike gewalt an den vnsen vnde an den juwen nemen dechten to donde, vnde juw dat vna den vnsen vorbodesschoppet worde, so begere wij fruntliken, dat gy dat willent helpen sturen na juwem vermoge, vp dat wy vnde gy an dem vnsen so verkorttet nicht en worden, nademe dat gy mit der hast beet darto beseten sin dan wy.
___________________________________________
erste Anlage 16.07.2005 Audrey Sue Peters, Jürgen Sarnowsky / letzte Bearbeitung 23.12.2008 /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1449