1449.02.15.

Luneburgensibus.

Post salutacionem.

Ersamen heren, leuen vrunde.

Juwen breff an vns gesant mit twen vtscrifften etliker breue, de de Ersame her Albert van der Molen, mine werde radescumpane vnde Hinrik Krumuot sik malkander hebben gescreuen, sondergen dat Henneke Oldeland, her Albertes dener, her Alberte hebbe vorebracht, dat Hinrik Krumuoet eme hebbe toenboden, dat de menne in deme Nyenlande beseten nicht en scholen vp der Elue vysschen etc. - gy begeren int lateste an juwem breue, dat wy by vnsem vogede to Rybenborch willen bestellen, dat he sollik gebode affdo vnde wy in enen kortten dach tekenen, dar gy vnde de juwe velich aff vnde to mogen komen, dar men de lude an beydent zijden der Elue mede bybringen moge vnde des dar to der kuntschop vnd vtdracht moge kamen etc. - mit andern meer worden hebbe wy wol vornomen.

Vnde, leue vrunde, nademe vnsen vrundes van Hamborch desset mede tokomet vnde juwe vnde der van Hamborch sendeboden kortes tor negesten dachvart in vnse stat werden komende, so moge wy mit juwen vnd der van Hamborch sendeboden vorder hir an spreken na legenheit der zaken to dem besten. Gode etc.