1448.00.00.

Witlik sy: alse twischen Johanne van dem Borstelle vnde Copeken Langhen wonaftich to Grouerorde vnde Johanne Monnike uppe ene vnde Kersten Grouere vnde Johanne sinem sone vnde eren rechten eruen uppe de anderen side van wegene enes stindfordes beleghen to Grouerorde twidracht vnde schelinghe is gewesen, welliker schelinghe vnde twidracht de vorscreuenen beiden parte in vrundschoppen to vorschedende bi den borgermeisteren vnde radmannen to Hamborgh namliken hr Hinrik Kotinghe, her Diderik Luneborghe vnde hern Erike van Tzeuen sin gebleuen; vnde desuluen schedeslude hebben sodanne twidracht vnde schelinghe vrundliken entweighelecht vnde vorscheiden in wise nagescreuen:

Jnt erste, dat Kersten Grouer, Johan Grouer sin sone vnde ere eruen vppe den haluen vorscreuenen stindford, den ichtiswanne Hinrik Wonnik vnde sine kindere gehad hebben, vnde den Johan van dem borstelle vnde Copeke Langhe no tor tijd hebben, nicht meer saken vnde spreken scholen vnde nenerleie breue vnde scrifte darup scholen bruken; men se hebben dessuluen haluen vordes gentsliken vorteghen vnde vorlaten to ewighen tiden. Vnde des breues, den de genante Kersten Grouer uppe den vorscreuen gantsen stindford heft, scholen desulue Kersten vnde sine eruen vnde en iewelik van erer wegene men allene uppe ere helfte des vorscreuenen stindfordes bruken.

Wes ok geschen is van den vorscreuenen beiden parten, dat de ene uppe den anderen in ienigherleie aneuanghe, id sy gheschen, wo id geschen sy, gedan heft, dat is ok vormiddelst dem vorscreuenen schedesluden to enem gantsen ende vrundliken vorscheiden, so dat erer een uppe den anderen vnde ok nemend van erer wegene dat scholen witen edder wreken sunder alle list in ienighen tokomenden tiden.

Vortmer wannere men uppe den vorscreuenen stindford pale stott, so scholen de vorscreuenen beiden parte dat ene hopp vmme dat andere stoten.