1446.07.15.

1446 Juli 15. [Hamburg].
Regest: Protokoll des Hamburger Protonotars Johann Rotgheri über Verhandlungen zwischen Hamburg und Lüneburg vor dem Rat Lübecks. Auf die Frage, ob die Klagen schriftlich vorgebracht oder mündlich verhandelt werden sollen beginnt ein Streit darüber, wer zuerst seine Klagen vorbringen soll. Hamburg bittet, seine Fischereirechte zu wahren, die es seit 70 Jahren bei Harburg ungestört wahrnimmt, und bittet bei dem Seinen gelassen zu werden, fordert nun aber, die Lüneburger Klagepunkte zu hören. Daraufhin kommt es zu Wortgefechten, schließlich lässt Lübeck einen Artikel des Hansetags zu Rostock 1417 verlesen und fragt die Hamburger, ob sie dabei bleiben wollen. Da die Ratssendeboten keine Anweisung dazu haben, wird ein Bote nach Hamburg geschickt.
Überlieferung: StA HH, A: Senat Cl. VI Nr. 1a Vol. 1 fasc. 5a. / D: Copiae Archivi. -
Beschreibung: A = Entwurf von der Hand des Protonotars Johann Rotgheri. / D = moderne Abschrift.
Druck / Edition: --.

An deme daghe der twelff apostelle weren to Lubeke uppe deme radhuse to achten in de clocken to daghe vorsammelt de Ersamen der van Hamborg unde Luneborgh radessendeboden in ieghenwardicheid des rades to Lubeke.

Darsulues vorhalede her Johan Klinghenberch van des rades wegene to Lubeke, wo de daghvard twischen den van Hamborgh unde Luneborgh were vorramed, unde sede vurder: ghelevede id den van Hamborgh, dat se de sake twischen en unde den van Luneborgh scriftliken, alse de overgheven weren1) vornemen scholden, edder wolden se de mundliken vorhandellen: dat scholde stan to beider vorscrevenen parte willen; unde sede vort: de van Luneborgh meenden, se weren de ghenne, dede seten in deme schaden, unde darumme so gheborde sik, dat se ere ansprake erst tieghen de van Hamborgh utsetten scholden.

Hirup vorantworden de van Hamborgh unde seden, dat to der ersten daghvard, de de van Luneborgh mid en binnen Lubeke heelden, desulven van Luneborgh van den van Hamborgh weten wolden, wat ere klaghe tieghen se weren; worup de van Hamborgh radessendeboden vorantworden unde seden: nademe se de ersten wesen scholden, so scholden se weten, dat se van ereme rade also nicht utghesand weren, dat se over de van Luneborgh klaghen scholden; men de rad van Hamborgh begherde unde bede vrundliken, dat de van Luneborgh se darbi laten wolden, dat se de fursten van Brunsszwijck unde Luneborgh sunderlighes bi der vischerie bi Horborgh, de de van Hamborg wol LXX jar rouwliken unde vredesamliken beseten hebben bi alle derghennen tijden, dede Horborgh innehad hebben wente an de Springkintgude2), unde vortmer bi der Dradenouw, dat se derghelijken vredesamliken, so langhe dat des nemend anders ghedencked, besetzen hebben; unde darumme, nachdeme se do tor tijd de ersten weren, de ere ghebreke segghen mosten, so borde sik dat nu ok, dat se de ersten ansprake deden tieghen de van Luneborg, unde beden noch, alse se tovorn ghebeden hadden, dat de van Lubeke [also] de van Luneborgh also underwisen wolden, dat se de van Hamborgh darbi leten, dar se de fursten van Brunsszwijck unde Luneborgh, rittere, gudemanne unde eres sulves borgermeistere, dede Horborg innehad hebben, wente herto belaten hebben: dat wolden se den van Lubeke vrundliken gerne afurdenen.

Hirup seden de van Lubeke, dat de van Luneborgh sik vorboden to rechte unde to aller redelicheid unde wolden nemen unde don, don unde nemen, wo sik dat na gescrevenen rechte gheborde. Dar der van Hamborg radessendeboden to antworden unde seden: wolden de van Luneborg en dat ere laten, alse se vorhenne ghesecht hadden, were dat de van Luneburg se denne worumme schuldigen wolden: dat wolden se gerne horen unde darto antworden. Aldus na velen reden unde wedderreden, de dar villen, so leten de van Lubeke lesen enen artikel in eneme recesse int jar XIIIIc XVII to Rostock ghemaked. Uppe sodannen artikel vragheden de van Lubeke, oft de radessendeboden der van Hamborg an den Artikel des recessus vulborden wolden; wente de van Luneborgh hedden ghesecht, dat se bi deme artikelle wolden bliven. Hirup antworden de radessendeboden der van Hamborg unde seden, se hadden nicht anders van ereme rade in bevele, men alse se rede ghesecht hedden. Hirup bespreken sik de van Lubeke, unde na erer besprake weren se begherende, dat der van Hamborg radessendeboden umme alles besten willen doch also vele deden unde senden ere bodeschop darumme to hus an eren raed unde vorhorden, oft sik ere raed hir icht ingheven wolden darinne.

___________________________________________

1) Dokument nicht mehr erhalten.
2) Der Lüneburger Bürgermeister Dietrich Springintgut besaß 1393 Wassergüter bei Harburg, sein Enkel, der Bürgermeister Johann Springintgut, 1440 Erbgüter auf dem Schloss Harburg.



erste Anlage 16.8.2017 Jürgen Sarnowsky, Sabine Schart / letzte Bearbeitung 16.8.2017 Jürgen Sarnowsky /
Bearbeitungsstand: erste Transkription, nicht mit dem Original kollationiert / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1446