1446.07.08.

Justis et hoestis supplicum votis, presentim illis, qui pro diuini cultus augmento et fidelium animarum salute cedere dinoscuntur, libenter annuimus illaque fauoribus non immerito prosequimur oportunis.

Sane dilecte nobis in Christo Abelem, relicte quondam Johannis de Aluerdingen consulis Hamburgensis, pia desideria ac singularem deuocionem, quas ad primam missam in ortu diei ad altare sanctorum Johannis baptiste, Symonis et Jude apostolorum et Ciriaci martiris in ecclesia beati Jacobi Hamburgensis celebrandam gerit, conspeximus.

In quo quidem altari ad honorem dei omnipotentis, qui cuncta largitur, in sue progenitorumque suorum ac omnium fidelium animarum salutem et peccaminum remissionem de bonis sibi a deo collatis et ad id pie ministratis quoddam perpetuum beneficium siue perpetuam vicariam vigintiocto marcarum lubicensium denariorum annuorum reddituum summa dotare decreuit. Quapropter dicta domina Abele vigintiocto marcarum annuos redditus perpetuos ex et de certis domibus et heredictatibus siue possessionibus in opido Hamburgensi et alibi situatis dicte perpetue vicarie pro tempore possessori singulis annis et temporibus in patentibus sigillatis literis et instrumentis publicis super hoc datis et confectis designatis soluendos ad usum et utilitatem eiusdem vicarie deputauit et assignauit. Qos etiam annuos redditus deo et nobis pure et liberaliter ad usum predictum obtulit, dedit et donauit, nobis humiliter supplicans, ut ex predictis vigintiocto marcarum annuis redditibus unam perpetuam vicariam ad altare predictum de nouo creare, instaurare, auctorisare et redditus ipsos sub ecclesiastica atque nostra protectione et defensione recipere dignaremur.

Nos itaque predicte domine Abelen pia desideria, voluntatem et oblaciones in domino laudabiles et honestas merito commendantes, huiusmodi vigintiocto marcarum annuorum reddituum oblaciones et assignaciones ratas et gratas habentes eisque sub ecclesiastica atque nostra libertate, protectione et defensione per nos receptis, de eisdem oblatis redditibus ad laudem omnipotentis dei sueque benedicte et gloriose matris virginis Marie unam perpetuam vicariam ad altare sanctorum Johannis baptiste ac Symonis et Jude pretactum auctoritate ordinaria, qua fungimur in hac parte, presentibus creamus de nouo, fundamus, instauramus et autorisamus, ordinantes et statuentes, quod vicarius, qui dictam perpetuam vicariam pro tempore obtinuerit, singulis diebus alternatis ebdomadis ad primam missam in ortu diei celebrandam et personalem in eadem residenciam faciendam ac de predictis redditibus et aliis fortassis ad eandem vicariam in futurum deputandis omni anno in festo sancti Jacobi apostoli duas marcas lubicenses in nostre beate viginis et duo talenta similium denariorum in beati Jacobi hamburgensium ecclesiarum choris more solito distribuendos soluendos debeat esse obligatus.

Preterea ut persone supradicte ad id subsidia prestantes spirituali remuneracione se gaudeant premiatas, concessimus et indulsimus ac presentibus concedimus et indulgemus, ut quocienscumque dictam perpetuam vicariam vacare contigerit, ius patronatus siue presentandi predicta Abele fundatrix interim quod vitam duxerit in humanis, habeat ad eandem.

Et deinde Wunneke, Johannis de Gheseke, et Wyba, Johannis Berscamp opidanorum hamburgensium uxores legitime, eiusdem Abelen filie carnales et quelibet earum coniunctim et diuisim dicte perpetue vicarie vacacionum temporibus occurrentibus et ad eandem ius presentandi habebunt. Quibus de medio sublatis dictarum Wunneken et Wyben filii et filie ac ab eis in recta linea descendentes ad dictam vicariam perpetuam sic, quod proximior et senior inter eos interim quod aliquis aut aliqua eorum extat, presentabit. Quibus omnibus fortassis ab hac luce migratis sepe dicte Abelen fundatricis proximior et senior consangwineus et consangwinea, personis religionis semper exceptis, huiusmodi ius patronatus ad centum et viginti annos a data presentium computandos, dummodo actu presbyterum aut infra annum in sacerdotem promoueri volentem uel aliquem ex eorum progenie abilem et ydoneum dericum presentare curauerint, et habebit. Hiis centum et viginti annis successine effluxis sepedictum ius patronatus siue ius presentandi penes supradicte ecclesie sancti Jacobi pro tempore iuratos, ut ad sepedictam perpetuam vicariam vacacionum temporibus occurrentibus in eadem ecclesia sancti Jacobi in hiis officiis, videlicet capellanum aut campanarium nullum beneficium habentem semper seniorem presentant instituendum, perpetuo uolumus permanere.

In quorum omnium et singulorum fidem et testimonium premissorum presentes nostras literas exinde fieri et per notarium publicum scribamque nostrum infrascriptum subscribi et publicari mandauimus sigillique maioris nostre ecclesie predicte iussimus et fecimus appensione communiri.

Datum et actum in loco nostro capitulari sub anno a natiuitatis domini millesimo quadrigentesimo quadragesimo sexto indictione nona, die vero Veneris octaua mensis Julii, hora primarum uel quasi, pontificatus sanctissimi in Christo patris et domini nostri, Domii Eugenii, diuina prouidencia pape quarti, anno decimo sexto presentibus ibidem discretis viris dominis Johanne Gruben et Hinrico Bonen, in dicta ecclesia beate Marie hamburgensis vicariis perpetuis, testibus ad premissa vocatis specialiter et rogatis.