1446.07.08.a.

1446 Juli 8. o.O.
Regest: Borchard und Johann von dem Buggen, Vater und Sohn, bekennen, dass sie der Stadt Hamburg, ihren Bürgermeistern und Ratsherren, Bürgern und Einwohnern wegen des Tods ihres Bruders in der Stadt eine Fehde angesagt haben, und listen weitere Adlige, die Hamburg ihretwegen entsagt haben.
Überlieferung: StA HH, A: 710-I 1 Threse Gg 98. / D: Copiae Archivi. -
Beschreibung: A = Original. / D = moderne Abschrift.
Druck / Edition: --.

Wy, Borchard van dem Buggen unde Johan van dem Buggen, dessulven Borchardes sone, Knapen, bekennen und betughen openbare in desseme breve vor alle den ghennen, de ene zeen edder horen lesen, alse wy den ersamen borghermeisteren, raedmannen, borgheren, inwoneren unde undersaten der stad Hamborgh ene veide in unsseme openen beseghelden breve umme unsses selighen broders unde vedderen willen, de binnen Hamborgh in vorledenen tiden van deme levende to dode is vorrichted, hebben vorkundighed,

unde desghelijk de duchtighen knapen Clawes unde Arnd van deme Horne, brodere Luderssons, Diderik Goade, Borchard van Bertzen, Diderik van Stafhorst, Ortghis van Wetholte, Roleff Clenck Rolenefsone, Johan de Ruiter, Juries van der Wenße, Roleff Vos, Johan van Vulle, Hinrik van Stendrem, Johan van Bucken, Clawes unde Huner, brodere, van deme Horne, Hinrik Hermelingk unde Roleff Clenck, umme unsser willen ere vigende ok sin gheworden.

Also hebbe wy Borchard undd Johan van dem Buggen vorbenande densulven borghermeisteren, raedmannen, borgheren, inwoneren unde undersaten der Stad Hamborgk nach deme wy vrundliken umme de vorscreben sake mid en sind ghesleten vor uns unde de vorgenande guden manne, de umme unsse willen, alse vorscreven steit, ere vigende sint gheworden, sodanner ansprake unde veide vorlaten unde de ghentsliken nedderslaghen, unde wy vorlaten en der ok in unde mid Kraft desses breves, unde wy unde unsse erven, geboren unde ungeboren, offte jemend van unser wegene willen unde geholen dar nummer upsalen, spreken unde manen, unde se ok dar nummer umme veiden in ienighen tokomenden tiden.

To groterer sekerheid, bekandnisse unde witlikheid alle desser vorscrevenen stucke hebbe wy, Borchard unde Johan van dem Buggen vobenand, vor uns unde unsse erven unde alle desse vorgenanden guden manne unse rechten ingheseghelle mid gudem willen hanghen heten to desseme breve.

Gheven na Godes bord veerteinhundert jar, darna in deme sos unde vertighesten jare des neghesten frigdaghes na unsser leven vrouwen daghe visitacionis.

___________________________________________

erste Anlage 16.8.2017 Jürgen Sarnowsky, Sabine Schart / letzte Bearbeitung 16.8.2017 Jürgen Sarnowsky /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1446