1445.12.21.
Ik Hans Stoter, borgher tho Hamborch, bekenne openbare in desseme breue vor allesweme, dat ik hebbe van den beschedenen mannen Hanse Lanckouwen, Hanse van Appen, Clawes Schonynge vnde Tydeken Holenbeken nu tho tiiden olderlude vnde vorstendere der broderschop unser leuen vrowen der losinghe in sunte Johannes kerken bynnen Hamborch to gantser nughe entfangen an ghuden ghelde, also to Hamborch genge vnde gheue is, vefteyn mark pennighe, De ik in myne vnde myner eruen witlike nutticheyt vnde behoff ghekeret hebbe, vnde dar vore schal ik vnde wil alle jar, dewile ik der suluen pennighe bruke, der ergenomeden broderschop vnde eren olderluden unbeworliken vnde wol to dancke gheuen vth myneme redesten wissesten ghude ene mark pennige to rente in allen achtedaghen tho wynnachten sunder yenigerleye hinder vnde vortogheringe.
Unde wanner de olderlude desser vorschreuenen broderschop de suluen veftey mark pennige my vor de suluen Rente nicht lenger laten enwillen, edder wanner ik de suluen pennige nicht lenger vorrenten wil, also voreschreuen steyt, Dat schal ik en vnde se my wedder een verdendeel jares touoren witlik don vnde vorkundighen, vnde wanne dat verdendeel jares vmme kamen is, So schal ik en vnde wil den vorschreuenen houetsummen vnde ok de Rente, de danne tokomen vnde bedaghet ist, tosamende mid reden pennighen de vorschreuenen munte wol to dancke betalen vnde wedder gheuen. Were ok sake dat ik der ergenomeden broderschop vnde eren olderluden de vorsprokenen rente vppe de vorschreuenen tiid to willen nicht betalede, dar got vore sii, vnde se danne koste vnde arbeyt darumme deden edder anderen schaden leden, dat arbeyt, koste vnde schaden schal ik vnde wil desser vorschreuen broderschop vullenkomeliken uprichten vnde wedderleggen.
Alle desse vorschreuen stucke tosamende vnde een islik besunderen loue ik Hans Stoter vorschreuen vor my vnde vor myne eruen mid den beschedenen mannen Peter Rosen vnde Gereke Roden mynen truwen medeloueren mid samender hand der ergenomeden broderschop vnde eren olderluden stede, vast vnde vnuorbroken tho holdende in guden truwen, sunder alle argelist edder hulprede geistlikes noch wertlikes rechtes.
Unde wii Peter Rose vnde Gereke Rode vorbenomet bekennen in desseme suluen breue dat wii mid vnsen eruen mid samender hand hebben louet vnde louen vor Hans Stoter vnde vor sine eruen alle ergenomede stucke der ergenanten broderschop vnde eren olderlude truweliken tho holdende in aller wise also voreschreuen steyt. To groterer tuchnisse der warheyt hebbe wii Hans Stoter, zakewolde, Peter Rose vnde Gereke Rode medelouerers vnse ingesegele witliken vor vns vnde vnse eruen hengen laten an dessen breff.
Geuen na godes bord in deme verteynhundertsten vnde vifvndeuertichsten jahre in Sunte Thomas dage des hilghen Apostoles.
___________________________________________
erste Anlage 16.8.2017 Jürgen Sarnowsky, Sabine Schart / letzte Bearbeitung 16.8.2017 Jürgen Sarnowsky /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1445