1445.07.28.

Wy bergermeistere unnd radtmanne der stadt Hamborch bekennen unnd bethugen openbar an deesem breve vor alle den, de ene sehen, hören edder lesen, datt wy mith wohlbedachteme mode unnd endrechtigem rade hebben geven unnd upgelathen, geven unnd laten up in crafft desses breves deme rectori der universiteten, den doctoribus unnd meisters des studii tho Rostock tein lübesche marck jarliker renthe uth allen gudern unnd renthen unser stadt thobehörende, de wy unnd unse nakomelinge demsulven rectori, doctoribus unnd magistris tho behoff unnd nutlicheit des gantzen studii unnd universiteten alle jhar, dewile se dat sulve studium tho Rostock hebben unnd upholden, scholen unnd willen geven, handtreken unnd bethalen uth unser stadt laden an den achte dagen tho paschen sunder thogeringe binnen Hamborch.

Were aver, datt se dat sulve studium tho Rostocke entwey gahen laten unnd nicht vor ein gemeine studium, alsse sichs gehoret, upholden, so schölen uns unnd unsere stadt desse tein marck geldes losss syn gefhallenn, so datt wy darvan nicht schölen plichtig wesenn tho bethalende.

Were ock, datt uns nicht gelevede, sodane renthe lenger uth desser stadt gudern tho gevende unnd se dat studium uphelden, so hebbe wy uns unnd unsen nakomelingen beholden, dat wy sodane renthe mögen losskopenn aljarlikes up Paschen vor hundert rinsche gulden unnd wan wy edder unse nakömelinge de hundert rinsche gulden der universiteten tho Rostocke hebben vornogett, so schole wy unnd unse stadt von sodanen renthen weic leddich unnd loss wesenn unnd van nemande mehr maninge darvan liden.