1445.02.26.

Bekennen vnde betughen openbare in dessem breue vor allisweme, dat wy mid vulborde vnsser overolderlude endrachtighen rechte vnde redeliken rechte kopes deme beschedenen mane Corde van Ghotinghe deme olderen, borghere to Hamborgh, vorkoft hebben vnde vorkopen ieghenwardighen in vnde mid kraft desses breues ene mark jahrliker ewigher renthe in vnde vthe allen desser vorscreuenen broderschop renthen vnde guderen vor viffteyn lubesche mark penninghe de wy rede van demesuluen Corde van Ghotinghe entfanghen vnde vort in der erbenomden broderschop bruklike mid ghekerd hebben. Vnde dessesuluen mark renthe schal men jarlikes vormiddelst den oldesten vnde junghesten twen olderluden desser vorsageden broderschop in nascreuener wise in godes ere to gheuende keren.

Also dat desuluen olderlude alse de oldelste vnde de jungheste desse vorferde mark renthe alle jar vppe winachten vpboren vnde entfanghen scholen. Vnde scholen denne veer schillinghe van dersuluen mark by syk beholden, dar moghen se mede don wes en gheleuet. Vnde de twelff schillinghe scholen se vort an der hillighen dre koninghe auende ofte des frigdaghes dar beuoren den armen krancken luden to deme hillighen gheiste vppe deme Achterhuse vnde den armen zeken to sunte Jurigen vppen stich eneme elliken personen twe penninghe vme godes willen geheuen.

Alle desse vorscreuenen stucke loue wy olderlude vorbenomed vor vns vnde vnsse nakomelinghe deme genanten Corde van Ghotinghe stede vast vnde vnuorbroken to holdende in guden truwen. Vnde hebben des to ener groteren witlikheid vnsse eghene jngheseghele nach deme de broderschop neen eghen seghel heft vor dessen breff heten hanghen.