1444.11.18.

Sciendum, quod coram dominis consulibus Hamburgensibus, in consistorio generaliter congregatis, ut sequitur, est conclusum, quod istud canale aquaticum, haereditati Conradi Volckerdinghes applicatum et annexum, prout eadem haereditas sita est in platea Longipontis, inter haereditates relictae quondam Johannis Vegelinghk et Olrici Bishorst iunioris, absque protelatione deponi debet, et ibidem in antea non iacere.

Insuper Ludolphus Semelhake, perpetuus vicarius in ecclesia beatae Mariae Virginis Hamburgensis, quatuor marcarum, ut dicitur, habet reditus haereditate in eadem, de quibus certae restant pecuniae, ut conqueritur, sibi annuatim non persolutae. Pro illis omnibus praescriptis, tam pro canalis depositione, quam pro illis quatuor marcarum reditibus et pecuniis, ut praefertur, non persolutis, dominus Nicolaus Vetel, consul Hamburgensis, pro se ac haeredibus suis fideiussit Conrado Volckerdinghe praenotato suisque haeredibus ac praedictae domus inhabitatoribus, quod ipse exinde nulla damna et impeticationes obviare debent, et totaliter eos indemnes de singulis praemissis tenere temporibus omnibus in futuris.