1444.09.27.

Wy Hinrik Hoiger, borghermeister, unde Albert Hoiger, borgher to Hamborgh, brodere,

bekennen unde begheren witlik // to vorkunden alle den ghenen, de deßen breff zeen adder horen lezen, dat wy hebben vorpendet hebben unde vorpenden in kraft // desses breues, den ersamen heren borghermeistern unde radmannen der stad Hamborgh, dat gud to deme Johansdorpe // mid aller siner vrigheid unde rechticheid, mit deme hoghesten unde deme sidesten rechte unde gherichte, mit ackern, wisschen, weiden, holthouwingen, holthingen, wateren, visscherien, afrisinghen unde upkominghen, jeghenwardig unde tokomende, wo de genomed sind, unde meenliken unde alle sinen tobehoringen, was dar ab kleuen mag, nichtes uthgenomen, alse dat sulue gud beleghen is in siner szede, unde alse Arnd unde Henningk, brodere, geheten de Herfleur, unde ere elderen unde voruaren dat alder vrigest hebben beseten, vor drutteinhundert Lubesche mark penninghe, de uns van densuluen borghermeisteren unde radmannen der stad Hamborgh in redem ghelde unde ghulde, alse binnen Hamborgh ghenge unde gheue is, to unsser gantsen noghe wol sind entrichtet, unde alse uns dat vorscreuen gud to deme Johansdorpe mit sinen tobehoringhen vor den vorscreuen summen penninghe van deme hochgeboren fursten und heren, hern Alue, hertoghen to Slesßwyck, greuen to Holsten, Stormarn unde Schouwenborgh, unserm gnedighen heren, is vorpendet, alse de houedbref uns van demseluen, unsserm gnedighen heren, dorup gegeuen unde bezegheld, inneholdende uthwised, welliken vorgherorende breff des ergenomeden heren hertoghen Alues to Slesßwyck, de borghermeistere unde radmanne der stad Hamborgh hebben mid unsseme guden willen.

To groteren witlicheid desser vorscreuen stucke hebben wy Hinrik Hoiger unde Albert Hoiger vorbenomed unsse ingheseghele mid gudem willen hanghen heten an dessem breff.