1444.04.03.
Witlik zii allen den ghennen, de desse schrifft zeen offt horen lesen, dat vormiddelst erbaren heren, der Henrik Kotinghe, borgermestrer, her Dyderik Moller unde der Detleff Bremer, radmannen to Hamborgh, sunderghes van dem rade dar to ghevoghed, sind vrundliken ghesleten unde vorened, der erbare vrowe Wibe, wandaghes Johan Brand, de wile he levede, eelike husfrowe, up ene ziid, unde Johan unde Henrik Brand, broderen, des ergen[omeden] Johan Brandes sones, up andere ziid, umme sodanne schelinghe unde vordreet twisschen en an beyden siiden wesende, in der naschreven wise,
dat Wibe erben[omed] sodannen acker, nameliken veftehalven morghen ackers, alse de to deme sulven Johan Brande brachte, schal roweliken bruken vor sik under ere erven sunder jenigerleye wedderseggend der ergen[omeden] brodere Johan unde Henrikes vorben[omed] unde erer erven unde dat desulven Johan unde Henrik ergen[omed] de sulve Wiben unde eren man umme de tiid over, dat se den acker to sik ward ghehad unde beseten hebben, nicht meer manen schollen.
Der gheliken so schollen de erben[omeden] Johan unde Henrik brodere gheheten Brand des velenghenomeden Johan Brandes zones, sodanner ghudere unde erve, des erben[omeden] Johan Brandes, eres vaders, alze desulve Wibe myd eme ghenomen hadde, unde ere erven, roweliken beholden unde der vredesameliken bruken, sunder der erben[omeden] wiben unde erer erven wedderseggend unde hinder to ewighen tiiden.
Dar to schal desulve Wibe den ergen[omeden] broderen Johanne unde Henrike Brande gheven veertich mark reder penninghe alse to Lubeke unde Hamborgh ghenghe unde gheve sind, de ersten twintich mark sodaner penninghe uppe sunte Johans dagh negestkomende unde de anderen twintich mark uppe sunte Mertens dagh senne sunder myddä neghestvolghende.
Dar to schollen de sulven brodere beyde den pacht van deme halven ghude desses jares upboren. Hir mede schal alle unwille unde vordreet twisschen beyden partyen ghantzliken to ende sleten unde wech ghelecht wesen, dat beide deel zu bewillet unde volbordet hebben.
Gheschen to Hamborgh uptem radhuse, des vrighdaghes vor Palmen in deme jare na godes bord XIIIIc unde XLIIIIsten.
___________________________________________
erste Anlage 27.8.2017 Klaus-Joachim Lorentzen-Schmidt, Jürgen Sarnowsky / letzte Bearbeitung 27.8.2017 Jürgen Sarnowsky /
Bearbeitungsstand: erste Transkription, noch nicht abschließend mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1444