1443.09.20.

Wy Cord van Gotinghen vnde Werner Rippeke ouerlude der broderscop sunte Marien Magdalenen in der baruoten clostere binnen Hamborg / bekennen vnde betugen openbare in dessem breue vor allisweme:

Alse wansdaghes Beke wedewe Johans van Achem / borghers to Hamborgh hefft gemaket souen lubesche mark jarliker renthe by desser vorscreuenen broderscop, also hebben de erbaren her Nicolaus Meiger vnde her Albert Widingkhusen radmannen to Hamborgh sunderges van dem rade dar to gheuoghet twischen vns van der vorgerorden broderscop wegenen / vnde Hermene Butzouwen borghere to Hamborgh van siner vnde Greten siner husvrowen wegenen de der vorgenanten Beken van Achem suster is gedegedinghed in wise nabescreuen: /

Dat de sulue Hermen Butzow vnd Grete sin husfrouwe der sos mark renthe van den vorscrevenen souen marken renthen jarlikes moghen vnde scholen keren in godes ere de tyd erer beyder Leuende wor en dat geleuet, vnde wan se beide van dodes wegenen sind voruallen / so scholen de vorsreuenen souen mark renthe samptliken bi desser erbenomden broderscop / na jnholde enes openen beseghelden breues dar up gemaket in godes ere bliuen to ewigen tyden.

Vortmer alse de vorgenanten Beke van Achem dre hunder lubesche mark penninghe desser vorscreuenen broderscop in godes ere hefft gegheuen Also hefft de sulue Hermen Butzow vnde Grete sin husfrouwe mid gudem berade vnde vrigem willen to laten vnde vullbordet / dat de sulven dree hunder mark penninghe bi desser bouenscreuenen broderscop scolen bliuen / deme Almechtigen gode to loue vnde eren ewichliken / alse de besegelde breff dar vp gemaket klarliken Inneholdende vthwised. /

Des to ener groteren witlicheid / hebbe wy Cord van Gotinghen vnde Werner Rippeke uorbenomen alse ouerlude desser erbenomen broderscop vor vns vnde vnsse nakomelinghe vnsse jngeseghelle hanghen heten to dessem breue. Vnde wy Clawes Meigher vnde Albert Widingkhusien radmannen vorbenomen bekennen in dessemsuluen breue / dat wy alle vorscreuenen stucke gehandelt vnde deqedinghet hebben vnde dat vmme dorch ener groteren witlicheid vnde bekendnisse so hebbe wy dorch beider erbenomen parte vrundliken bede willen vnse jngeseghelle mede an dessen breff heten hanghen /