1442.08.01.

1442 August 1. Hamburg.
Regest: Auf Vermittlung von Hinrik to dem Berghe und Vicke van deme Hove, Bürgermeistern, und vor dem vom Rat beauftragten Bürgermeister Hinrik Kotingh und dem Ratsherrn Nikolaws Meiger sind erschienen Nicolaws Langhe, Ratsherr zu Hamburg, auf einer Seite, sowie Olric Bisthorst und Han Hulscheden, für den Schiffer Hermen Grote, Nicolaws Rogher, Cord van Dalen, Hinrik van Lune und Hans Muntmeisters to Gorghe, um sich über die Zahlung für ein Schiff und die darauf transportierten Güter zu einigen, die von Frederick Snepell genommen und von Langhe ausgelöst bzw. wiedergewonnen (uthgemaket) wurden. Nikolaws Langhe soll dafür 550 m. lübisch bezahlen, 50 m. lübisch an die beiden Schiffer Hermen Grote und Nicolaws Rogher, den Rest in zwei Teilen. So bezahlt Nikolaws Langhe 423 m. an Hans von Ghetellen aus Lübeck, der für weitere Berechtigte handelt, und 77 m. 2 d. an die Bevollmächtigten von Hans Mintel, muntmeisters to Gorghe.
Überlieferung: StAHH, Senat Cl. VIII Nr. XVIIIa1 Band 1 = Liber memorandorum 1369-1532 [B], p. 111/1. -
Beschreibung: B ist gleichzeitige Register-Abschrift.
Druck / Edition: --.

Witlik sy alse in den jaren Cristi unsses heren XIIIIc unde veertighesten an sunte Petri ad vincula daghe, vormiddelst den erbarn hern Hinrike to dem Berghe unde her Vicken van deme Hove, borgermeisteren, van wegen her Nicolawes Langhen, radmans to Hamborg, uppe ene, unde Olric Bisthorste unde Han Hulscheden, van wegen schipher Hermen Groten, Nicolawes Rogher, Cordes van Dalen, Hinrikes van Lune unde Hans Muntmeisters to Gorghe uppe andere side in ieghenwardicheid her Hinric Kotinghes, borgermeisters, unde der Nicolawes Meigers, radmans der vorscreven stad Hamborgh, sunderghes van deme rade to Hamborg dar to gevoghed alse guden middeleren umme en schip unde sodanne gudere, alse in deme schepe weren, den erbenomeden personen vormiddelst Frederic Snepelle ghenomen unde van her Nicolawes Langhen uthgemaked, is ghedeghedinghed,

dat en desulve her Nicolawes Langhe vor sodanne schep unde gudere sostehalfhundert Lubesche mark penninghe scholde entrichten unde betalen, der de erben[omeden] schipher Hermen Grote unde Nicolawes Rogher viftich Lubesche mark penninghe uppe den vorscreven sunte Petri dagh van her Nicolawes Langhen rede heft entfanghen unde de vifhundert Lubesche mark penninghe to sulcken twen terminen, alse in deme contratte in desseme boke tovorn is ghescreven, scholde betalen.

Also is vor desseme Rade wewsen Hans van Ghetellen, borgher to Lubeke, mid eneme openen beseghelden breve des rades to Lubeke unde Arnde van Lune van erer unde erer selschop wegene ere andeele van deme vorn[omeden] her Nicolawese Langhen van den vorscr[even] vifhundert marken uptoborende heft desulve Hans van Ghetellen ene opene beseghelden Quitacien under der stad Dantzik unde dessen nascrevene Coirdes van Dalen, Hermen Groten, Hinrikes van Lune, Nicolawes Rogher, Bertoldes van Zuchten unde Gregor Zitz inghezeghellen besegheld, inneholdende wan her Nicolawes Langhe de vifhundert Lub[esche] mark den vorben[omeden] Corde van Dalen, Hermene Groten, Hinrike van Lune unde Nicolawes Rogher heft entrichtet und betaled, dat deme desulve her Nicolawes Langhe van sodanner vifhundert mark betalinghe na ynneholde sullcker Quitancien quiit unde los wesen scholde.

Aldus heft us desulve her Nicolawes Langhe uppe de vorgheroden breve deme eben[omeden] Hanse van Ghetellen uppe den vorghescrevenen sunte Petri dagh in desseme ieghenwardighen XIIIIc unde XLIIsten jare veerhundert unde XXIII Lub[esche] mark in reden penninghen betald, unde boven de vorgherorden breve unde quitancien hebben de erben[omeden] Gherardus de Boeris unde Hans van Ghetellen vor sik unde ere erven deme genan[den] her Nicolawese Langhen unde sinen erven geloved unde gudgesecht, dat se van des vorscreven schepes unde gudes wegen, alse den vorgenan[den] Corde van Dalen, Hermene Groten, Hinrike van Lune, Nicolawes Rogher unde erer selschop dar van andrepen, unde ok umme de vorscreven veerhundert und XXIII Lub[esche] mark nummer scholen ghemand werden in allen tokomenden tiden.

Dergeliken heft her Nicolawes Langhe betald Hinrike van der Vechte, borghere to Hamborg, LXXVII mark unde twe penninghe Lub[esch] van wegen Hans Mindels, muntemeisters to Gorghe, vor sinen andeel des vorscr[even] schepes unde gudes, unde boven sine quitancien uppe sinen andeel des vorscr[even] schepes unde gudes mid der stad Lunden inges[eghel] besegheld, heft desulve Hinric van der Vechte vor sik unde sinen erven geloved unde gudgesecht, dat se van deme andeele schepes unde gudes den genan[den] Hans Mindels anrepende, unde ok van den vorscreven LXXVII marken unde twen penninghen, de her Nicolawes Langhe deme erben[omeden] Hinrik van der Vechte to des vorben[omeden] Hans muntemeisters truwenhand vor sodanne andeele schepes unde gudes betold heft, unghemaned wesen unde bliven scholen in allen tokomenden tiiden.

Dit is gescheen in den vorgerorden jaren Cristi unsses heren XIIIIc XLIIsten uppe sunte [Petri ad vincula].

___________________________________________

erste Anlage 27.8.2017 Klaus-Joachim Lorentzen-Schmidt, Jürgen Sarnowsky / letzte Bearbeitung 27.8.2017 Jürgen Sarnowsky /
Bearbeitungsstand: erste Transkription, noch nicht abschließend mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1442