1442.07.27.

Int erste, dat de genan[de] Immeke mach unde schal van Ludeken Rickquerdes wesen unde by sik sulven, wor er dat gheleved wonen unde Ludeke Rickquerdes schal nenerleie macht hebben, desulven Immeken noch mid gheistlikem edder werldlikem rechte to enghende, dat se wedder to eme kome unde mid eme wese unde wone.

Were ok, dat Immeken in tokomenden tyden mid deme vorgen[anden] Ludeken Rickquerdes to wesende unde to wonende bequeme were, dat schal alletyd stan unde wesen in dersulven Immeken willen unde behaghe, unde des en schal er Ludeke Rickquerdes nicht vorwesen und vorsegghen.

Vortmer schal Ludeke Rickquerdes der erben[omeden] Immeken de helfte van alleme inghedomete sulversmide unde klenade, alse Immeke dat hadde, do se deme sulven Ludeken eeliken wart ghetruwet, gudliken handreken unde gheven.

Dergheliken schal he eer viftich mark jarliker renthe, alse se de uthe allen renthen, de he mid medeghift und eer heft ghenomen kesende wert tokenen unde in desser stad rentheboke laten scriven, sunder in allen anderen erer beider guderen alse se de nu tor tyd samptliken hebben, schal Ludeke Rickquerdes mid Immeken erer beider dochter restliken bliven besittende unde der brukaftich wesen unde he schal de ergenan[de] Immeken, sine husfrouwen, nerghene ane vorminderen.

Ghevalled id ok also dat Ludeke Rickquerdes erve dar nu tor tyd hundeert unde twe mark renthe ane sind, unde dat Ludeke Rickquerdes to Immeken unde de helfte des erves de nu tor tyd mid nenerleie renthen beswart is unde desulve Immeke to Ludeken Rickquerdes gebracht hebben und erer beider endrachtighem vulborde unde willen by levende Immeken erer beider dochter vorkoft werden in tokomenden tyden. Wes denne dat vorscr[even] Ludeken Rickquerdes erve durer den de hundert twe mark renthe vorkoft wert und dat halve erve der vorscr[even] Immeken, wo dure na sinem werde dat wert gegheven, van sodannen summen penninghen schal Ludeke Rickquerdes der erben[omeden] Immeken, siner husfrouwen, den enen driddendeel unde Immeken erer beider dochter den anderen druddendeel brukliken laten volghen.

Wurden aver dat vorscr[even] Ludeken Rickquerdes erve und der erben[omeden] Immeken, siner husfrouwen, halve erve samptliken ofte bisunderen na dode Immeken erer beide dochter vorkoft unde erer beider endrachtighem vulborde unde willen in vorscr[evener] wise, so schal Ludeke Rickquerdes de helfte von sodannen summen penninghen de van den vorscr[even] erven komende werden Immeken, siner husfrouwen, volghen laten.

Dergheliken were ok, dat Ludeken Rickquerdes edder Immeken, siner husfrouwen, erflike gudere van dode erer beider vrunden by levende Immeken erer beider dochter anvellen in tokomenden tyden, wellikeren van en beiden van sinen vrunden sodanne erflike gudere anvallen unde vorledighen, de schal den enen druddendeel van sodannen erfliken guderen beholden unde de anderen twedeel den anderen twen personen van en dren gheven unde volghen laten. Vorledighen aver sullike erflike gudere na der vorscr[even] Immeke erer beider dochter dode, so schal deghenne, deme van sinen vrunden sodanne gudere anvallende tokomen, deme anderen de helfte sulliker gudere handreken unde gheven.

Sterved ok Immeke, der erben[omeden] Ludeken Rickquerdes unde Immeken dochter by erer beider levende, so schal Ludeke Rickquerdes Immeken, siner husfrouwen, de helfte van allen dersulven erer beider dochter nalatenen guderen gheven unde volghen laten. Mid dessem underschede, dat Ludeke Rickquerdes unde Immeke, sin husfrouwe, desse bovensc[reven] gudere in allen vorscr[even] artikellen vorclaret nicht vorquaden, mit renthen beswaren, vorkopen, vorpanden edder vorgheven scholen in allen tokomenden tyden.

Wes ok in vorledenen tyden twischen Ludeke Rickquerdes unde Immeken, siner husfrouwen, alse se syk in deme hillighen echte vorsammelden, is gedeghedinghed unde gesloten unde in enem contractu in den jaren der ghebord Cristi, unsses heren, XIIIIc XXXVII in desser stad contractboke gescreven, dat schal dessen vorgherorden artikellen unde scriften nicht zo vorvanghe unde hindere wesen. Men desulve contractus nach sinem inneholde schal mid sampt dessen in vullenkomener macht bliven unde wesen.