1442.05.03.

1442 Mai 03. Hamburg.
Regest: Bürgermeister und Rat der Stadt Hamburg bezeugen, dass sie sich mit den Rüstringern und Wangerern vollständig ausgesöhnt haben, aus deren Ländern unschuldige Kaufleute durch Seeräuber schwer geschädigt wurden, und dass sie mit ihnen einen Bund zur Wahrung der wechselseitigen Handelsfreiheit geschlossen haben; im Fall eventuell erwachsender Konflikte mit Olrik zu Norden, Aurich und Esens sollen diese Hamburg informieren; dabei und für den Fall von gegenseitigen Übergriffen sollen die Vorwürfe auf den Rechtsweg geklärt werden.
Überlieferung: A = Oberlandesarchiv Jever, Landessachen. B, C, D = StAHH, [...]. E = StA Aurich, [...].
Beschreibung: A ist Original, Pergament, Siegel ab; B-D ist Parallelüberlieferung dazu mit dem selben Datum und Wortlaut, d.h. die Reverse, die Hamburg ausgestellt und überreicht wurden:
B Tanno Duren unde Sybet brodere to Jever, Rustringhen, Ostringen und Wangheren, Lubbe Onnelkeldes to Kripense etc. hovedlinghe, und zugleich Hayen Harldes milder dechnisse,
C den gemenen inwonren der lande Rustringhe unde Wangheren in Oestvreslande,
D den ghemeenen inwonere des landes Oestringe in Oestvreslande; Original und Abschriften;
E ist der Revers des Häuptlings Ulrich von Emden, Norden, Aurich und Esens; Original.
Edition: aus A Oldenburgisches Urkundenbuch, Bd. 6, Urkundenbuch von Jever und Kniephausen, Oldenburg 1932, Nr. 152; http://www.urkundenbuch.net/index.php?show=152; Ostfriesisches Urkundenbuch, Bd. 1, Emden 1878, Nr. 533.

Wy borghermeistere und radmane der stad Hamborg bekennen unde betughen openbare in desseme breve vor allisme:

Alse in vorledenen tyden twidracht unde unwille dorch derghennen willen, de van den hovedlinghen unde inwoneren der lande Rustringhen, Ostringhen unde Wangheren vorsammeld unde bi en in densulven landen wurden entholden, de den unschuldighen copman to der se wart in live unde gude unvorwinliken beschedigheden, twischen uns unde den vorscrevenen landen upgestan is to mannighen tiiden, so hebbe wy dorch guder endracht unde vredes willen uns mid den inwoneren ghemeenliken der lande Rustringhen unde Wangheren umme alle twidracht, schelinghe unde unwillen, de twischen uns unde unser stad uppe ene unde den ghemenen inwoneren der vorscrevenen lande uppe andere side wente uppe dessen dagh gifte desses breves sind gewesen, gentsliken unde endliken gesoned, ghevredet unde tosamende gesated in desser wys, dat de inwonere der vorscrevenen lande Rustringhen unde Wanghern in unse stad Hamborgh unde in unser stad gebeede vor uns unde de unse velich moghen körnen, varen, keren, kopen unde vorkopen, unde wy willen unde scholen se vor ungevoch unde overval, wor wy des mechtich sind, beschütten unde beschermen sunder gheveerde unde arch. Were ok jemend, de se ergheren edder overvallen wolde, so wille wy unde scholen se vorscriven, wan se uns dat witlik don, unde ere beste weten, alle de wile wy erer to rechte mechtich sind.

Wurde ok jenich twidracht twischen Olrike to Norden, Aureke unde Esensen etc. hovedlinghe, sinen landen, luden, vrunden, undersaten, nakomelinghen ofte erven uppe ene, unde den insetenen der vorscrevenen lande Rustringhen unde Wanghern, eren nakomelinghen ofte erven uppe andere side samptliken ofte bisunderen in tokomenden tyden, dat god vorhoden unde afkeren mote, sodanne twidracht unde schelinghe schal de ene uppe den anderen mid overvalle, rove, brande edder beschedeginghe nicht wreken edder vorhalen, men se scholen uns dat scriftliken edder mundliken, weme des van en behoeff wert, vorkundighen unde binnen sulliker tyd, alse en van uns denne wert getekend. erer een deme anderen under eren ingeseghellen klaghe unde ansprake, de de ene to deme anderen menet to hebbende. in scriften overantworden, dar denne deghenne binnen dersulven getekenden tyd. de also beklaghed werden, in scriften wedderumme up antworden scholen. Unde want se an beiden siden klaghe unde antworde also overgheven hebben, scholen de beiden twidrachtighen deele ere klaghe unde antworde ok binnen sulliker tyd, alse wy en darto tekenen unde scriven, insenden to Hamborgh unde sik denne van uns in vrundschoppen nach erer beider willen edder in rechte vorscheiden unde entweilegghen laten.

Scheghe ok jenich anevangk van uns bogermeisteren, radmanen, borgheren, inwoneren ofte undersaten der stad Hamborgh uppe de insetene der vorscrevenen lande Rustringhen unde Wanghern edder van en unde den eren wedderumme uppe uns ofte de unse, dat schal men na seden, wonheide unde rechte der stede, dar sodanne anevangk schud, richten, unde dar schal desse vrundlike endracht unde tohopesate nicht mede vorbroken wesen, men allikewol bi vullenkomener macht bliven. Ok scholen de insetene der vorscrevenen lande Rustringhen unde Wangheren in nenen tokomenden tyden vitalienbrodere edder andere lude, dede uns ofte de unse edder den unschuldighen copman beschedighen, in den vorscrevenen eren landen unde gebeden husen edder heghen unde ok van nemende darsulves ane husen edder heghen laten. Beholden uns borgermeisteren unde radmanen der stad Hamborg unde unsen nakomelinghen des, dat desse vorscrevene sone, vrundlike endracht unde tohopesettinghe der vrundliken tosate unde endracht twischen deme genanten Olrike unde Idzerde, ichtiswanne sinem brodere milder dechtnisse, to Norden, Aureke unde Ezenze etc. hovedlinghen uppe ene unde uns borgermeisteren unde radmannen der stad Hamborgh uppe andere side ghemaked, vorbreved unde vorsegheld, nicht to vorvanghe unde hindere schal wesen, men allikewol twischen deme ergenanten Olrike unde den sinen unde uns unde den unsen schal geholden werden unvorbroken.

Alle desse vorscrevenen worde unde artikelle love wy borgermeistere unde radmannen der stad Hamborgh vor uns, unse nakomelinghe, borgere, änwonere unde undersaten den insetenen der vorscrevenen lande Rustringhen unde Wanghern truweliken unde vastliken to holdende sunder jenigherleie arghelist.

Unde hebben des tughe unde bekandnisse unser stad secret ingeseghel witliken unde mid gudem willen hanghen heten to dessem breve,

de gheven unde gescreven is na godes bord veerhundert jar in deme tweundeveertigesten jare uppe des hillighen Crucis dagh Invencionis.

___________________________________________

erste Anlage 17.07.2005 Jürgen Sarnowsky / letzte Bearbeitung 03.01.2009 /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1442