1442.00.00.

Int erste is bespracken unde geschlaten, dat alle gene, dat een egen rock uff huß to Hamborch hebben, se syn to huß, mit weme se to huß syn, de scho^elen oeren tollen geven.
Item alle Hamborger schepe, de tolbar guth geladen und inheben, de scho^elen de Schwinge nicht vorby faren, sondern de scho^elen dar setten, wo sick dat gebo^eret und also zedelick is, und schal de schipper gan thom tollen, und seggen an, dat he den tollen hale, so schall de to^elner to oem uth kamen, unde entfangen den tollen, is et sacke, dat de to^ellner to em nicht kamen kann, so mo^egen se na Hamborg segeln, da mag em de to^ellner folgen up oere kost.

Item hebben se ock neen tollbar guth in, scho^elen se allewol zetten, unde upleggen, unde gaen bi dem to^ellner, unde offt de tollner des nicht nehmen will, so scho^elen se dat mit oeren rechte holden. [...]

Item alle Hollender schepe, de tollbar guth hebben geladen, wente alle Hollender sind tollen plichtig, de varen averlang de Schwinge vorby und seggen, dat guth ho^eret do Hamborg to hus, de mag de tollner wedder anhalen, drapt he de buten Hamborg, drapte he de averst nicht, mag he nafolgen to Hamborg, und mag sick an so dan vorfallen gud holden.

Item, so by mindes hern vorfaren is geschehen, wannehr schepe de Schwinge vorby faren, unde hadden tollen guth in, unde quemen binnen Hamborg, de plag de tollner, vor den van Hamborg nicht to fordernde, alse de van Hamborg dat ene tidlang vornehmen, dat sick doch so nicht gebo^erde. Wente de van Hamborg siner gnaden richter in dese nicht en waren, sondern de van Hamborg scho^elen de geven, de si myn gna^edigen heren den tollen vorfaren hebben averandworden, dat sine gnade des gennen und sinnes gudes werdig sey, de so siner gnaden und Su^ente Peter synen tollen vorfaren hebben. [...]

Item, alle undersaten des stifftes van Bremen mo^egen unde scho^elen de Elve frie up und dael faren, sunder enigerlei beschweringe offt hinder.