1441.05.23.

In Godes namen amen.

Witliek sy, dat in dem jare na dem bord unsers heren Jhesu Christi 1400 een unde veertich des Middeweckens na deme Sondage, alse men singet Misericordias Domini in der hillighen kerken, de erlu^echtighe fu^erste und hochgeboren here, here Alef, hertoghe to Schleßwick, to Holsten, Stormarn, und Schouwenborgh greve, und wy borgermeistere unde radmanne der stad Hamborgh, mildichliken ouertrachtet hebben, alse in vorledenen jaren de grotmechtige here, here Erick to Dennemarcken etc. ko^eningk, unde wy in schwarem kriege wa^eren begrepen, unde unser stadbo^erghere, inwonnere, unde soldenern, mit samt den steden an den Orssunde tieghende Denen to stride quemen in unsses vorgen. gnedigen heren siner lande, unde unsser stad truwen denste, deme ghemenen gude to vortkome unde vromen.

Wellicke strid also toghingk unde bestellet was van unsen medehu^elpernn, dat unse borghere, inwanere unde soldenern Gode enfarnet, jamerliken van Dodes wegen verbleuen unde een deel ghefangen wurden, de in dersu^elvigen vengknisse van deme levende to dode sin gekomen, so dat toghingk, alse dat witlick unde openbar is, godlick sy unde van kirstli- / {S.54} cker truwe wegen sick billicklichen wol gebo^eren dat den gheuen, de also in teuwene deenste des gemenen gudes ere blod geghoten hebben unde verstoruen sin, eren zelen ock ewich dechtnisse by gude to troste und selicheyd van deme ghemenen gude mildichlicken nafolghende werde ghestichted und ghemacket.

Hiruth so isset, dat Gode allmechtig, Marien siner moder der reinen maghed, unde der hilligen vrouwen Su^ente Elizabeth, unde allem hemlischen here to loue, eren unde werdigheit binnen unse stad in Su^ente Niclawes kercken, is ghebuwet ene capelle, darinne sie funderet, upgeheuen unde ghemacket twe vicarien unde twe elemosine, veer preestere beleend unde beualen, missen in dersu^elven capellen den vorschreuenen verstorvenen u^emme erer zelen salicheid wille na to singende unde to lesende, alse de fundacien unde scrift darouer gemacket, dat fu^erder in holdende uthwisen, unde ene ewige lampe in dersu^eluen capelle to bernende, unde vort een hospital van twintigh personen armer bedderedighen mynschen van beiden ku^ennen, unde veer personen de de armen lu^eden denen to erer nod unde behoef, ene herberghen, heghen unde holden scho^elen mit hu^elpe anderer guden lu^ede unser bo^erger unde bo^ergherschen, den ere milden almisse unde handreckinghe, darto dan hebben, unde noch dagelickes dohn.

Wellick huß belegen is binnen unse stad uppe der Nigenborgh twischen den eruen h[er]r[n] Hinrick Hoygers borgermeisters unde Hanß Rodewaters, unde wy hebben eendrechtigen gheorlouet unde tholgelaten, dat men sodane rente, alse de vorscrev[en] Su^ente Elizabeth capelle, vicarien, elemosine, lampe, lechte unde ditsu^elve Su^ente Elizabeth huß to der armen lu^ede behoef, jeghenwardighen hebben, unde darto in tokamenden tiden vorlaten worden, scriven mag in desen boek sunderghes darto gemacket, unde wo vacken men renthe to der vorscreuenen capellen, vicarien, elemosine, lampe, lechte unde des huses, unde de arme lu^ede behoef will vorlaten ofte uthlo^esen, dar scho^elen de olderlu^ede de des jares dese capellen unde dat huß vorwaren jeghenwardig wesen, unde van sodanen renten, unde dem huse schal man der stad schott unde plicht geuen. Ock scho^elen de olderlu^ede der vorscreuenen capellen unde des huses, alle jar eens rekenen, unde ouer de reckenschop scho^elen unses rades kumpane, de de jarlickes der stad hillighen geest vorwaren unde jeghenwardig wesen, unde wes denne meer is van der vorscreuenen huses wegen, den men to demsuluen huse unde to den armen lu^eden behouet, dat scho^elen de vorghero^erden unses rades kumpan nehmen, unde tokeren den armen lu^eden in der stad hillighen geste, unde want denen gebo^erlickes, nademe de dancken der mynschen wegfallig syn, up date de handelinge der mynschen de Gade to siner ere, und den kristenen zelen to saligheit unde troste mildichlicken werden ghestichtet, unde ghemacket in nauolgenden tyden unvorgheten bliuen, unde nicht undertoghen werden. So isset, da wy borghermeistere und rathmanne der stad Hamborgh vor uns unde unse nakomelinghe deses boek unde schrifft hebben bestedighet, unde bestedighen u^emme desser vorscreuen armen zelen willen to ewighen tiden.

Liber redituum hospitalis parvi Sancti Spiritus vulgariter nuncupati inter muros Hamburg.

D[omi]n[us] Henricus Hoieri proconsul resignavit supra dictae domui 10 marcarum reditus pro 200 mare redimendos, in haereditate sua, sita prope Burstade inter haereditatem Johannis Vullen et dictam domum s. hospitale S[anc]tae Elisabeth. Paschae instet census.