1441.00.00.

Witlik sy, dat vor den borgermesteren unde radman der stad Hamborg uppe deme radhuse darsulves ghemeenliken vorsammeld sind gewesen Brader Schele unde Hinric Schele van erer unde Mathias Schelen eres broders wegen, ichteswanne Clawes Schelen milder dechtnisse sons, wonaftich in deme lande to Hadellen unde Tideke Nigenborch unsse borgher.

Unde desulven Brader Schele unde Hinric Schele van erer unde Mathias Schelen wegen, eres broders, hebben openbarliken bekand unde tostan, dat se sik mid deme vorben[omeden] Tideken Nigenborge van wegen Beken erer suster, nu tor tyd dessulven Tideken Nigenborges husfrouwen, umme drutein morghen landes, beleghen^a) vor deme slote Ritzebuttel in deme lande to Hadellen unde alle andere gudere, alse de an se unde Beken, ere vorben[omede] suster sind gekomen, van dode Clawes Schelen, eres vorben[omeden] vaders, unde de driddedeel van den druteinen morghen landes unde van densulven guderen, de der vorben[omeden] Beken, erer suster, tobehord gentsliken to ende vordreghen hebben in desser wys, dat se Tideken Nigenborghe vor den driddendeel van den drutein morghen landes unde aller anderen gudere, alse de van wegen Beken, erer vorben[omeden] suster, van dode des genan[den] Clawes Schelen, eres vaders, vort an eme gekomen sind und de en den driddendel der vorscr[even] guder wedder vorlaten heft, scholen unde willen, oft desulve Beke ere sustere van dodes wegen eer Tideke Nigenborghe, ereme eliken manne vorvelle unde afginghe, sunder elike kindere van demesulven Tideken Nigenborge und eer samptliken geteled, vor aller erfschichtinghe unde delinghe de denne an se unde ere erven van den redesten guderen van dode der vorben[omeden] Beken, erer suster, vallen unde kamen moghen, deme gegan[den] Tideken Nigenborgh hundert Lubesche mark penninghe tovoren innelaten sunder alle insaghe unde hulperede, de en unde eren erven ienigheleie wys hirane to hulpe kamen moghen.

___________________________________________

a) beleghen doppelt.