1411.12.17.

Wy Johan Bekerholt to Lubeke unde Gherbert Gultzow to Hamborch borghere bekennet openbare an dessem breve vor allesweme, dat uns de ersamen heren de raed van Hamborch van des duchtighen mannes weghen Junkher Kenes hovetlinges to dem Broke vruntliken entrichtet unde wol betallet hebben hundert engelsche nobelen de uns Kene vorscreven samentliken schuldich was na utwisinge synes openen bezegelden breves welke hundert nobelen wy gentzliken unde to voller noghe entfangen hebben unde dancken dem raede unde Kene vorbenomed guder betalinghe unde wy laten myd wolberadenem mode unde gudem willen den raed unde ere nakomelinge, Kene unde syne erven samentliken unde besundern vor uns unde vor unse erven van der ergenanten summen penninghe quit leddich unde loez myt craft desses breves unde hebben dar up deme rade vorscr[even] to Kenes truwe hand des sulven Kenes penebref myd gudem willet wedder gheantwerdet. Unde to merer tuchnisse desser vorscreven stucke[n] hebbe wy Johan Bekerholt unde Gherbert Gultzouw unse ingezegele wiitliken vor dessen bref gehenget.