1409.04.12.
Den ersamen wisen luden unde heren borgermeisteren unde radluden to Gotinghen embede wi, borgermeistere unde radmanne to Hamborg, vruntliken grut mit begeringhe alles gudes tovoren.
Ersamen leven vrunde, iuwer leve danke wi vruntliken, dat gi Johanne Brockkehovede unsem borger unde Bernde synem knechte vorderlik unde behulpen weren, alse wi irvaren hebben, dat se alse pelegrimen loes wurden der vengnisse, do se latest by iuwer yegherne hindert unde toved weren, mank anderen pelegrimen, unde konnen wi iuw oft den iuwen ierghen ane to beheghelicheid unde to willen wesen, dar to wille wi alle tid gherne willich unde bereyde wesen. Vortirn schulle gi gantze tovorsicht unde vulkomenen loven to uns hebben, dat de irghenente Johan Brokkehoved unse borger unde Bernd sin knecht uppe de tid alse se gehinderd wůrden, also vorscreven is, weren rechte pelegrimen unde weren do uth unsser stad openbaer also scheyden, unde sint noch uthe anders nerghen umme, men dat se over meer to deme hilgen grave umme godes willen meenden pelegrimatze to theende, anders enschulle gi, oft god wille, van erer weghenne nicht irvaren. Sijd gode bevalen.
Screven under unsser stad secretsegil to rugghe gedrucked an dessen breff, des negesten vrigdages na passchen ind iar unsses heren 1409.
___________________________________________
erste Anlage 19.11.2006 Dieter Neitzert / letzte Bearbeitung 03.01.2009 Jürgen Sarnowsky /
Bearbeitungsstand: Edition abgeschlossen / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1409