1398.03.21.

Wyr Hinric Viscule, Otto Garlop Borg[er]mestere, Nicolaus Gronehaghen und Johan van Empsen radmanne to Luneb[o]r[g] bekennet openbare in dessem breve vor allesweme, dat de duchtige ridder her Ortghys Klencok uns vruntliken to uns[er] notroft behuff und to borghe ghelenet heft anderhalffhund[er]t m. penninge alze nu^v to Luneb[o]r[g] ghenge und geve sint. De wy in reden telden penningen entfangen und uppeboret hebbet. Desse anderhalffhund[er]t m. wille we und schullen h[er]n Ortgise Klencoke vorbenom[et] und synen erve[n] betalen bynnen den achte dage sunte Michael[is] neghest to kom[en]de na ghift desses breves bynnen Hamb[o]r[g] edder Luneb[o]r[g] der stede, en welkere en bequemest is in reden pen[n]ingen unbekum[m]ert und unghehind[er]t van allesweme sunder lengern vortoch und eren schaden. Und were dat we de betalinge der anderhalffhund[er]t m. also nicht endeden, so wille we und schulle des achteden dag[es] na sunte Michael[is] dage vorbenom[et] unghemanet inkomen to Hamb[o]r[g] und dar eyn recht inleg[er] halden. Und dar nene wys u^et we enhebb[e]n en de vorscr[even] anderhalffhund[er]t m. erst deg[er] und al betalet. Alle vorscr[even] stucke und enyewelk besundern hebbe wy Hinric, Otto, Clawes und Johan, alle vorbenom[et], h[er]n Ortgise und synen erve[n] und to erer truwen hant hern Wille[m] Grovele domhern, h[er]n Kerstene Milese, hern Johanne Hoyers borg[er]mestern und hern Alberte Screyen radmanne to Hamb[o]r[g], Hern Johanne Langen und h[er]n Alb[er]te van der Moln borg[er]mestern to Luneb[org] und deme, de dessen breff heft sunder des sulven h[er]n Ortghiß weddersprake mit samder hand in ede stade und in guden truwen ghelouet hebb[e]n to holdende sunder alle list vor uns un[d] unse erue[n] Des we to bekantnisse unse ingheseghele witliken hebbe[n] ghehenget laten an dessem breffen.