1397.09.29.

1397 September 29. [o.O.].
Regest: Vertrag zwischen dem Land Hadeln und der Stadt Hamburg.
Überlieferung: StAHH, A: 710-1 I Threse Q7; D: Copiae Archivi.
Beschreibung: Urkunde, Vertrag. - Pergament, auf Trägerpappe geklebt; Führungslinien; Siegel an Pergamentpressel an Plica; Rückaufschriften: [1.] 1397
Tohopesate van v jaren. [2.] ll; 3: Registrata. Edition: --. / Regest: HG1.469.

Wy hovedlude unde de ghantze meenheyd des landes to Hadelen bekennen und betugen vor allesweme, dat wy uns vor eenet unde ghesatet hebben to den eerbaren mannen borgermesteren und raedmannen der stad to Hamborch to vyf yaren negest volgende na ghifte desses breves in desser nascr[even] wyse:

Int eerste, dat wi mit eres slotes to Ritzebutle ynwoners dar sulves unde erer undersaten dar to behoerende besten truweliken ummegan willen unde schullen. Unde weret, dat bynnen dessen vorscr[even] vyf yaren ze yenich landeshere, voerste, gudman, land ofte lude an erem vorschrevenem slote, gude unde luden vorunrechten wolden, tegen de schuolle wi ze to rechte beden unde vorbidden, zo wi vorderst moeghen. Weret, dat de denne neen recht van en nemen wolden unde ze dar over to kryge quemen, zo schulle wy mit unsem ghantzen lande unde willen eres vorscr[even] slotes ynwoneren unde eren vorscr[even] undersaten truweliken behulpen wezen, ze unde dat ere helpen to weren, men wi enschullen nicht plichtich werden, en volge to donde buten unse land to Hadelen, yd en zi, dat wi mit en under anderen des eendrachtliken to rade werden. Vortmer weret, dat ze bynnen dessem vorscr[even] vorbunde umme unsen willen to kryge qwemen, zo enschulle wi uns nicht afzonen efte afdagen, yd en zi mit erem willen. Tho groterem tuchnisse zo hebbe wy unses vorbenomeden landes ingezegel witliken ghehenget laten an dessen breef.

Gegheven na Godes bord in dem dusentsten drehundertsten sevenundenegentichsten iare op den dach zunte Michaelis des hylgen ertzengeles.

___________________________________________



Abschrift der Vorlage 16.07.2017 Fabienne Petzold / Anlage, letzte Bearbeitung 08.08.2017 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen:
Juergen.Sarnowsky@uni-hamburg.de (Jürgen Sarnowsky)

zurück zur Regestenliste für 1397