1389.04.15.
Witlik si, dat wi, Heyne Vloghelingh unde Meyneke Oldendorp, borghere to Hamborch, hebbet ghelovet unde lovet deme duchteghen riddere, hern Johannen Hummersbutelen, unde zinen erven
vor sestehalfhundert mark penninghe vor den erbarn manne, hern Johanne Zemelbeckere, raadmanne to Luneborch, unde vor zine erven, welken pennynghe de zulve her Johan Zemelbecker rede opgheboret unde entfangen heft unde in zine nuet ghekeret heft. Desse vorschreven penninghe schulle wi unde willen unde unse erven betalen hern Johanne Hummersbuttele unde zinen erven, alze nu to paschen kumpt vort over een iaar bynnen den veer hilghendaghen to passchene bynnen Hamborch in ghueden reden penninghen alze to Hamborch ghenghe unde gheve zuent sunder ienegherleye arghelist edder hulperede.
Dit love wi vors[creven] Heyno unde Meyneke mid ener sammeden hand vor uns unde vor unse erfnamen deme vors[creven] hern Johanne Hummersbuttelen unde zinen erven unde to ener truwen hand den beschedenen mannen unde erliken heren hern Bertramme Horborghe, hern Ludeken Holdensteden, borghermesteren, hern Ludeke Wulfhaghene, raadmanne unde Johanne Munde, borghere to Hamborch, unde den duchteghen knapen Ulrike unde Koneke Staken, broderen.
Dit is gescheeen des ghuden Donredaghes in der stilleweken, dar was over her Albert Schreye.
___________________________________________
erste Anlage 23.08.2002 Klaus-Joachim Lorenzen-Schmidt / letzte Bearbeitung 05.01.2009 Jürgen Sarnowsky /
Bearbeitungsstand: am Original erfolgte und korrigierte Transkription / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1389