1386.04.14.
Witlik si, dat wi Heyno Ybingh, borghermester, Richerd Kyl, Johan Hoyer, raadmanne, unde Werner Bere, borgher to Hamborch, hebbet ghelovet unde lovet deme duchteghen riddere, hern Johanne Hummersbuttele unde zinen erven vor veerteynhundert mark unde dortich mark pennynghe vor de ervaren lude unde heren alze vor hern Diderike Springuntghud, borghermestere, hern Johanne Dicken, hern Hinrike Visculen under vor hern Alberte van der Molen, raadmanne to Luneborch, unde vor ere erven, welke pennynghe her Dideric, her Johan, her Hinric unde her Albert rede opgheboret hebben unde in ere nuot ghekeret hebben.
Desse vorschreven pennynghe schulle wi unde willet bunde unse erven betalen hern Johanne vorsc[reven] unde zinen erben, alze nu to paschene kumpt, vort over een jaar bynnen den veer hilghen daghen to paschene bynnen der stad Hamborch in ghuden reden penninghen alze to Hamborch ghenghe unde gheve zunt, sunder ienegherleye arghelist edder helperede.
Dit love wi vorschrevene vere, alze ik Heyne, Richchert, Johan unde Werner unde unse erven mid ener sameden hand deme vorschreven hern Johanne unde zinen erven unde to erer truwen hand den beschedenen mannen unde erliken heren hern Bertramme Horborghe, hern Ludeken Holdensteden, borghermesteren, hern Ludeke Wulfhaghene, raadmanne, unde Johanne Munde, borghere to Hamborch, unde den duchteghen knapen Ulrike unde Koneke Staken, broderen.
Dit is gescheen des sonnavendes vor palmen. Dar was over her Albert Schreye.
___________________________________________
erste Anlage 25.8.2017 Klaus-Joachim Lorentzen-Schmidt, Jürgen Sarnowsky / letzte Bearbeitung 25.8.2017 Jürgen Sarnowsky /
Bearbeitungsstand: erste Transkription, noch nicht abschließend mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1386