1383.01.16.

Witlik si, dat her Ludeke Holdenstede unde her Bertram Horborch hebben ghedeghedinghet twischen Heynen Remsteden unde Tymmen van Orden

umme de schelinghe, de twischen en was van der betalinghe weghen veerdehalf hundert unde achteundetwintich mark unde veer pennynghe, dat dat leste gheld is, dat men Maken Steenbeke schuldemeren betalen schal, alzo dat Tymmo vorsc[reven] schal betalen de vorschreven veerdehalfhundert unde achte unde twintich mark unde veer pennynghe den schuldemeren, den Make Steenbeke schuldich is ghebleven. Unde to der betalinghe schal Tymme vorsc[reven] hebben unde inmanen alle de schuld, de men Maken Steenbeken schuldich is ghebleven, alze veerdehalfhundert unde achte unde twintich mark unde veer pennynghe, alze vorgeschreven is unde dar schal eme Heyne Remstede truweliken helpen to intemanende, alze he beste kan.

Were aver, dat Tymmen brake worde, dat he alze vele nicht inmanen konde, alze de vorsc[reven] summe is, de he betalen schal, so schal he edder syne erfnamen na dode Henneken Holsten zone Johannis Holsten zalegher dachtnisse hundert unde twintich mark van des sulven Hennekens ghude to vorn utnemen unde opboren, eft em alzo vele entbrekt unde dat ander ghuet denne vort delen na stadrechte. Were over, dat eme zo vele nicht enbreke alze hundert unde twintich mark, so schal he nicht meer to vorn dar van opboren den eme brake is unde dat andere io delen na stadrechte.