1370.11.25.

Witlik si alle den, de dessen bref horen lesen edder sen,

dat ik Marquart Kovot, en knape, bekenne unde betuge openbare in desser scrift, dat ik mit rade unde volbort miner rechten erfnamen hebbe vorseeth dem vrommen manne Johanne van Wedele, borgere to Hamborch unde sinen brorderrn unde senen rechten erwende de wisch, de belegen is bi deme dorpe to Holne in deme kercspele to Wedele, vor vertich mark Hamborger penninghe, de mi alrede betalet unde in minen not gecomen sint, to ses jaren, des ik binnen den ses jaren nicht losen nescal edder nemant miner vrent von miner wegene. Na den ses jaren so mach ik edder mine rechten ervende dat gut losen to allen sunte Peters dagen ad cathedram. Das love ik Marquard vorescreven mit minen medeloeveren Johanne Kovote unde Hinrike Kulen deme vorescrevenen Johanne van Wedele unde sinen broederen unde Henneken Redere van Holne unde sinen rechten erfnamen unde redet dat mit ener samender hant vastliken to holdende ane jenigherhande argeliist.

Dat dit war unde vast si, so hebbe wi vorescrevenen Marquard unde Johan Kovot unde Hinrik Kule unse ingesegele henghet in dessen jegenwardigen bref.