1355.09.05.

Nos Wernerus, Dei gracia prepositus, Johannes, decanus, et capitulum ecclesie Hamburgensis. Coram vobis, honorandis et sapientibus viris, dominis ..(a)consulibus Lubicensibus, pro informacionibus nostris tradimus et exhibemus, quod honesti viri, ..(a) consules Hamburgenses, cum erecto uexillo et exercitu ciuitatis Hamburgensis bona et villas ecclesie Hamburgensis incendijs et rapinis post inhibicionem a sede apostolica eis factam et causa inter ipsos et nos stante in iudicio devastauerunt, scilicet Barrekesbutle, Osterstenbeke, Wedinghehusen, Stenwarde, Kroneshorst, Papendorpe, Grotense, Hoyerstorpe, Wolkesuelde, Sprenghe et Todendorpe, que ville ad nos et ecclesiam nostram cum omni proprietate et libertate nec non cum iudicio maiori et minori spectant pleno iure, ac propterea non solum secundum ius canonicum, sed eciam secundum leges imperiales in hoc ipsi .. consules Hamburgenses nimium excesserunt.

Et huiusmodi dampnum, in quantum nos concernit et tangit, vltra decem milia marcarum denariorum lubicensium estimamus, et hoc, prout de iure tenemur, nos offerimus ad probandum. Et perpendendum est, quod dicti ..(a) consules Hamburgenses recte non possint dicere, licet de facto dicant, quod dictum dampnum fecerint super dominos ..(a) comites Holtzacie tantummodo, quia tempore conbustionis et spoliacionis ipsi incendiarij et spoliatores voces suas extollentes clamauerunt: Excommunicent nos modo ..(a) canonici, videntes, in quo proficiant!

Secundo apparet, quod, si non ex speciali odio fuissent moti ad incendendum et spoliandum villas ecclesie Hamburgensis, vtique illas non incendissent nec spoliassent, sed depactassent, id est dingnesse recepissent, sicut de villis illorum de Reynenvelde et Reynenbeke depactaciones receperunt.

Item coram vobis, dominis ..(a) consulibus Lubicensibus, super expensis per ..(a) consules Hamburgenses nobis refundendis loco informacionis proponimus, quod dicti ..(a) consules in Romana curia sunt condempnati ecclesie Hamburgensi in expensis, que taxate sunt iudicialiter ad sexcentos et sexaginta quattuor florenos, quod ipsi ..(a) consules non possunt denegare.

Item dicimus, quod, quemadmodum vos, sapientes viri, domini ..(a) consules Lubicenses, recolitis, quod parati fuimus, iam sunt tres anni, et ad hoc coram vobis ipsis presentibus nos obtulimus, quod super quadam pretensa composicione, quam prefati .. consules allegabant, tunc in vos libenter voluissemus conpromisisse, sed ipsi consules hoc facere expresse recusabant, qua de causa et eciam propter ipsorum manifestam inobedienciam negocium iterato uenit ad curiam, vbi denuo expensas fecimus ad summam mille et sexcentorum florenorum.

Insuper vltra huiusmodi expensas et dampna supradicta ex eo, quod ciuiloquio eorum publice communitatem contra nos concitauerunt, de beneficijs nostris cessimus et non potuimus residere, sicut prius ante litem: ex hoc dampnum perpessi sumus vltra tria milia marcarum denariorum lubicensium.

Petimus igitur, quatinus consilio et matura deliberacione prehabitis infra tempus in compromisso vobis decretum pronunciare et diffinire dignemini, quod pretactas summas marcarum et florenorum dicti ..(a) consules Hamburgenses infra certum terminum ipsis a vobis in pronunciacione prefigendem nobis et ecclesie nostre restituant et restituere teneantur sub pena apposita in ipso conpromisso, et quod pronunciacio et diffinicio vestra per vos facienda, postquam facta est, nobis vestris sigillatis litteris presentetur.

Discuciat eciam vestra prudencia, utrum ..(a) consules Hamburgenses racionabiliter possint exigere dampnum, quod sustinuerunt racione gwerre, quam cum dominis ..(a) comitibus Holtzacie habuerunt.

Item discrecio vestra videat, utrum iidem ..(a) consules iuste possint petere expensas, quas in Romana curia fecerunt, ex quo ibidem tres diffinitiuas sentencias perdiderunt, quia non victor victo, sed victus victori tenetur ad expensas.