1355.08.12.

Primo super statutis dicetur hoc modo.

Nulla statuta fecimus contra ecclesiasticam libertatem et bene favemus, si quis bona sua in usus ecclesiasticos dare voluerit, sicut ante XXX annos et ultra in civitate ista est rite observatum.

Item de pecunia fabrice servabitur, sicut in literis super hoc confectis continetur.

Item de sepultura tempore interdicti tenebitur, sicut de iure oportebit servari.

Item clericus vendet hereditatem suam sub ea condicione sicut laicus et in hoc non impedietur.

Item institores non permittentur stare in ecclesiis et capella sancte Anne et in diebus processionis in ambitu non stabunt et bancas deportabunt et infra decem annos consules de apto loco cogitabunt.

Item de cloaca ecclesie fiet, sicut capitulo et consulibus videbitur expedire.

Item talis annos dabitur de molendinis, cum qua quilibet potest satis facere bono viro.

Item testes synodales nulla fraude retrahentur ab accusando illos, qui de iure fuerint in synodo accusandi, sicut secundum consuetudinem antiquitus in civitate ista est rite observatum.

Item clerici et laici debent prohiberi, ne immunditias ad cimiteria effundant.

Item ad structuram ecclesie beate Marie poterunt cremare cementurm in cimiterio eiusdem ecclesie, si in aliis cimiteriis fuerit crematum.

Item nullus inducetur nec prohibebitur ad offerendum verlingos, sed quilibet secundum voluntatem suam et gratiam sibi adeo datam offeret, quod sibi placebit.

Item oblationes et alie devotiones fidelium in vigiliis defunctorum et divinis officiis fient, sicut a XXX annis est observatum.

Item ab ancilla ecclesiasnon exigetur nec recipietur schot pro redditibus quos ecclesia sibi tribuit annuatim, sed tantummodo pro bonis, si qua habet in iure civitatis.

Item de confugientibus ad ecclesias servabitur, sicut iura canonica et civilia mandant teneri.

Item de hospitalibus domorum sancti spiritus et sancti Georgii tenebitur sicut in privilegiis civitatis et capituli continetur, sicut est antiquitus observatum.

Item laruati non current in ecclesiis tempore divinorum.

Item pecunie pertinentes ad vicarias in usus earum convertentur, et que precepte sunt per testatores fundari, quantotius fundabuntur secundum testatoris ultimam voluntatem, si secundum ius civitatis de talibus bonis testari potuit.

Item campanarii in ecclesiis parrochialibus statuentur accedente ad hoc consensu plebanorum.

Nos Paulus Hake canonicus Bremensis, Lubicensis et Zwerinensis ecclesiarum ac Nicolaus Vos(2) perpetuus vicarius ecclesie Hamburginensis presentibus protestamur, quod honesti viri Nicolaus Fransoyser et Thidemannus Uppemperde, proconsules Hamburgenses, super articulis contentis in cedula excisa cui presens littera sub nostis sigillis est transfixa, concordaverunt cum reverendis viris dominis Wernero preposito, Iohanne decano, Hinrico scolastico et Ludolfo cantore ecclesie Hamburgensis nomine ipsius ecclesie perpetue observandis. Item presentibus protestamur, quod predicti duo proconsules nomine consulum et civitatis Hamburgensis bona fide promiserunt, quod ispi et consules Hamburgenses cum predictis dominis preposito et decano et capitulo Hamburgensi super redditibus et bonis ecclesiasticis, qui non debent solvere et dare schot, debent infra hinc et festum omnium sanctorum(3) nunc proximum concordare cum effectu et super illis, in quibus concordaverint, litteras patentes debent dare et sigillare sigillo civitatis capitulo Hamburgensi.

In cuius rei testimonium sigilla nostra presentibus sunt appensa.