1353.10.31.
In nomine Domini amen.
Nos Volradus Dei gratia episcopus Raceburgensis ecclesie universis et singulis presentes litteras inspecturis seu audituris cupimus esse notum lucide protestantes, quod, cum villa Zarneuitze sita in parrochia Celmerstorpe nostre dyocesis et quedam alie possessiones ad mensam nostram episcopalem spectantes quibusdam civibus Lubicensibus pro magnis pecuniarum summis essent per predecessores nostros obligate et, nisi villas et possessiones ad presens redimeremus, ecclesia nostra easdem in perpetuum amitteret sine spe recuperationis earundem, nos cum religiosis viris dominis preposito, priore et capitulo ecclesie nostre sollempni et diligenti(a) tractatu prehabito, qui in alienationibus rerum ecclesiasticarum fieri consuevit, cupientes huiusmodi dampno congruis obviare remediis, cum nullas res mobiles haberemus, quibus dictas villas et possessiones recuperare possemus, perspeximus et reputavimus magis fore utile et expediens pro parte(b) dictarum possessionum vendere seu distrahere pro iusto pretio quam ipsarum totalem perditionem cum detrimento maximo sustinere. Unde nos Volradus episcopus predictus premissa debita iuris sollempnitate de beneplacito, consilio et consensu capituli nostri vendidimus et dimisimus iuste emptionis et venditionis titulo et in hiis scriptis vendimus, dimittimus et assignamus rite et rationabiliter honorabilibus viris dominis preposito, decano, capitulo et ecclesie Hamburgensi Bremensis dyocesis villam nostram Zarneuitze predictam cum omnibus attinentiis suis, agris cultis et incultis, pratis, pascuis, paludibus, cespitibus, lingnis, rubetis et nemoribus, aquis aquarumque decursibus, terminis terminorumque distinctionibus, instangnationibus, piscationibus, cum decima minuta, precaria, iudicio maiore et minore et omni libertate, possessione, commoditate et proprietate, censibus, redditibus et quibuslibet emolimentis inde derivantibus, prout dicta villa ad nos pertinuit et eam dinoscimur hactenus possedisse, pro octingentis florenis boni auri et ponderis Lubicensis nobis numeratis et realiter persolutis, quos convertimus et expendimus in recuperationem possessionum predictarum, promittentes bona fide pro nobis et nostris successoribus, quod prefatos dominos prepositum, decanum, capitulum et ecclesiam Hamburgensem nullo umquam tempore per nos vel alios publice vel occulte, directe aut indirecte ex quacunque occasione sive causa impediemus vel molestabimus in villa predicta et eius iuribus et redditibus vel libertatibus quibuscunque, ymmo ipsos molestantes vel impedientes pro toto nostro posse fideliter compescemus et colonos eiusdem ville tamquam nostros viriliter defendemus.
Verum quia prelibati domini prepositus(c), decanus et capitulum Hamburgense iudicium et servitium dicte ville, ne propter distantiam ipsius ville ab ecclesia Hamburgensi eiusdem ville coloni in huiusmodi servitio et iudicio exhibendo nimium gravarentur, et etiam ex speciali amicitia et favore, quibus nos et ecclesiam nostram prosequuntur, nobis et nostris successoribus commiserunt, nos e converso pro nobis et nostris successoribus promittimus et nos firmiter astringimus in hiis scriptis, quod nos et successores nostri, qui fuerint pro tempore, huram sive censum et redditus predicte ville, qui de communi cursu sexaginta quatuor florenos Lubicenses de pondere, quod nunc est, annuatim se extendunt, colligi fideliter annis singulis faciemus et eos Lubeke transmittemus et presentabimus in quolibet festo beati Martini(2) dictis dominis aut eorum procuratori vel certo nuntio sub nostris periculis et expensis. In quo si nos vel successores nostri negligentes fuerimus vel summam dictorum florenorum in pondere, quod tempore date presentium(d) retinerit(e), complete, ut premittitur, non dederimus, extunc eo ipso prenominati domini prepositus, decanus et capitulum habebunt plenam potestatem dictam villam tamquam rem propriam intrandi, redditus suos expignerandi, colonos capiendi ac iudicium et servitium dicte ville personis ecclesiasticis(f) vel secularibus committendi nobis vel successoribus nostris et eorum officialibus minime requisitis; salva nichilominus prefatis dominis actione super dilatione solutionis seu diminutione prefate summe contra nos vel successores nostros competenti.
Peterea supradicti domini prepositus, decanus et capitulum Hamburgense ex mera liberalitate nobis et nostris successoribus indulserunt, quod pretactam villam infra quadraginta annos a data presentium continue numerandos reemere poterimus, quandocunque decreverimus, in festo Katherine(3) virginis pro dicta summa octingentorum florenorum boni et legalis auri lubicensis in pondere, quod nunc habent, scilicet tempore date litterarum, eis infra civitatem lubicensem simul et integraliter persolvenda, et extunc censum et redditus de prefata villa percipient complete et levabunt de summa principali nichil defalcando, quia in primo huiusmodi contractus termino huiusmodi censum et redditus minime perceperunt. Post lapsum vero dictorum annorum nullam facultatem habebimus reemendi villam predictam, sed apud dictam ecclesiam Hamburgensem perpetuo remanebit. Ut autem prefatus emptionis et venditionis contractus iustus(g) et rationabiliter inviolabiliter observetur, renuntiamus voluntarie, expresse et ex certa scientia beneficio restitutionis in integrum, exceptioni non recepte, non numerate pecunie et in utilitatem ecclesie nostre non converse, rerum non sic existentium sive gestarum, doli mali aliisque iuris et facti exceptionibus quibuscunque necnon omni iuris beneficio et canonici et civilis, quibus possemus contra contractum huiusmodi in toto vel in parte in futurum venire seu quomodolibet nos iuvare.
In cuius rei testimonium sigillum nostrum presentibus est appensum. Et nos Iohannes prepositus, Hinricus prior totumque capitulum ecclesie Raceburgensis recognoscentes premissa omnia et singula esse vera vocatis et presentibus omnibus, qui debebant et poterunt(h) interesse in termino ad hoc capitulariter assignato in loco capitulari congregati, premissis omnibus et singulis nullo contradicente consensimus et hiis consentimus et ea rata et grata habentes approbamus et in signum huiusmodi consensus et approbationis presentes litteras appensione sigilli ecclesie nostre duximus roborandas.
Datum et actum Raceborch anno Domini MoCCCo quinquagesimo tertio in vigilia Omnium Sanctorum presentibus religiosis et discretis viris dominis Hinrico Wnrowe, Petro de Cymeze, Iohanne de Salem, Ottone de Grunowe, Wernero de Halberstadt, Frederico Moltsan, Hermanno de Ortzen, Iohanne de Ponte, Bernardo Goltdoghen, Hinrico Wittorpe, Nycolao Franzoyser, Hinrico Westfal, canonicis dicte ecclesie Raceburgensis, Volrado de Dorne canonico Zwerinensi, Hermanne de Hamme rectore ecclesie in Luttekenborch, Petro rectore ecclesie in Sternebergh, Hinrico de Crummesse milite et aliis fide dignis testibus ad premissa vocatis specialiter et rogatis(i).
___________________________________________
(b) parte
doppelt geschrieben, das eine Mal unterpungiert.
(c) prepositi
in der Vorlage.
(d) presentium
am Rande.
(e)
So in der Vorlage.
(f)
Nach ecclesiasticis: vel prefatis dominis
durchstrichen.
(g)
So in der Vorlage.
(h)
So in der Vorlage.
(i)
Über der Urkunde steht: anno Domini M
o CCC
o LXI
o fuerunt reempti isti redditus.
(1)
Zur Verfügung des Kapitels über den Besitz vgl. Meklenburgisches Urkundenbuch, Bd.13: 1351-1355, Schwerin 1884, Nr. 8013, S. 556-57, von 1354 Dezember 12.
(2)
November 11.
(3)
November 25.
erste Anlage 13.06.2002 Galina Halmschlag, Jürgen Sarnowsky / letzte Bearbeitung 22.12.2008 /
Bearbeitungsstand: erste Transkription, nicht mit dem Original kollationiert / für Rückfragen: Juergen.Sarnowsky@uni-hamburg.de (Jürgen Sarnowsky)
zurück zur Regestenliste für 1353