PrUB, MS 6

{Überlieferung}
A = OBA 11355.

{Drucklegungen}
--.

{Regest}
JH I 11355.

{Diplomatische Erörterung des Stücks}
Originalbrief auf Papier.

Erwirdigster lieber her hoemeister myn undertenig willig und schuldige gehorsame, und was ich guts vermag uwern gnaden mit willen von mir zuvoran bereyt: Gnediger herre, alszdeme uwer gnade, die herren prelaten und gebiettiger zu Prewssen mich noch biszhere mit falcken, habichhunde und feder spiel geeret und begabet haben, und wie wole der bischoffe zu Samlant myne vorfaren dergleich iars auch mit feder spiele geeret hat, so hat er doch mich noch zurzeit als die andern myne herren prelaten mit keynerley feder spiels begabet noch geeret. Herumb gnediger herre biett ich uwer gnade ime zuschreiben und zu untterweisen, solche alte herkommen zu hanthaben und mich iars auch als wole als uwer gnade und die andern zu begaben, uff das ich unser herrn die fursten deste volliglichs begaben und zu unsers ordens gunste geziehen moge. Auch zweiffelt mir nit uwer gnade bevelhe uwern gnaden felckner zu yeder zeit mich mit guten falcken zu eren. Aber mich bedunckt sie teylen wie sie wollen, biett ich uwer gnade auch darvor zu sin, das will ich mit gantzem vermogen wo ich vermag umb uwer gnade verdienen. Geben zu Horneck in Crastino Sancti Laurencii Martyris anno etc. L secundo.