PrUB, JS 418

{Überlieferung}
B = OF 2c, p. 126 [olim Registrant des Hochmeisters Konrad von Jungingen, Nro. II, fol. 59v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 51-52.

{Regest}
Hansisches Urkundenbuch, Bd. V, Nr. 274, S. 144;

{Diplomatische Erörterung des Stücks}
Gleichzeitige Abschrift, Papier.

Erwirdige lieben herren und frunde.
Euwern brieff uns neste gesant haben wir liplichen entfangen und wol vornomen, in dem ir uns geschriben habit undir andern worten, daz wir unsere burgere und undirsasen unser stete wissen liessen, dass sie keyn gut in euwir vynde landen furen liessen, noch ir gut liessen czu legen in euwer vynde bodeme etc.
Erwirdige lieben herren und frunde, so thun wir euwer gute czu wissen, daz wir is umb euwer liebe willen von staden dar unsern burgern und undirsasen haben lasen wissen, uff daz noch euwer begerunge euwer vynde von uns icht gesterket wurden. Ouch so haben wir eygentlichen vornomen, daz die euwern, die ir uff die see usgesant habit wedir euwer vynde, uns und unsere burgere, schippherren und kowflute, do sie us frunde lande, als us Egelant czu unsern landen ken Prusen segiln solden, groslichen und jamerlichen beschediget haben. Sie haben ouch unser stadt von Danczik holken und unser burger schiff und gut genomen, sie und ere frunde gemordet und geslagen.
Und daz wir uch noch euwers briefes uswisung vor- {S. 52} schriben solden, ab wir welden, daz ir ichtes dorczu thun soldet, daz solde wir uch vorschriben. Und wen wir mit uch nicht anders wissen den lip gut und fruntschaft, und worumb, so hoffen wir wol, czu Gote umb guter eyntracht und gutes alders willen, daz ir uns, den unsern und der toden frunde alzo vel do vor thun und wedirfaren lasset, alz daz fruntlich, erlich und recht ist. Und bitten uch flislich, das ir yo dornoch seit, daz uns und den unsern daz geschee, uff daz uns vort mer keyne clage und manunge not ist umb der schelungen willen an euch czu thun, und begeren dis briefes eyne gutige antwert by desem bewiser.
Geben czu Marienburg an der Mittewochen vor Bartholomei apostoli Anno XCVII^mo.