PrUB, JS 368

{Überlieferung}
B = OF 2c, p. 109-10 [olim Registrant des Hochmeisters Konrad von Jungingen, Nro. II, fol. 51r-v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 43-45.

{Diplomatische Erörterung des Stücks}
Gleichzeitige Abschrift, Papier.

Czum ersten, allirdurchluchster furste und allirgened[igster] herre, czweyerley botschaft synt geschen an unsern homeister von uwer grosmechtikeit, die erste von heren Temeritcz, wy ir inen tag soldet haben ufgenomen cwisschen im und herczog Wytowt von Littowen off sente Johannis tag Baptiste nehst komende czu Breslow. Dy ander ist geschen von myr von Sigsmund wegen.
Uff die erste botschaft spreche man, allergned[igster] herre, vordenket unsern homeister nicht, das her dy antwert vorczogen hat offe dy erste botschaft, wen is geschen ist umb notsache willen mancherley botschaft, dy her beyde an uwer grosmechtikeit, an unsern heiligen vater den babest, korfursten und andre herren czu der czit hatte, und unberoten her sich ane dy nicht snelle konde vorantworten, nemlich ane rot synes capittels.
Item, allirgned[igster] lieber herre, euwer botschaft qwam an unsern Homeister, do stunt iczunt herczog Wytowt mit vorworten und yn botschaften, begernde eynes fredes und das her welde thun eyn moglichs uff dy anmutunge, dy in dem somer geschen was uff dem tage czu sicherunge des cristenthums, umb deswillen unser homeister gesant hatte gebietiger czu Wytowt, czu vorhorende synen willen, die mittenander haben eynen tag des fredes ufgenomen III wochen noch Ostern an dem Sontag, als man singet in der kirchen Jubilate deo omnis terra nehst komende. Und mag do unser homeisters eyns mit im werden, also das her thun will eyn moglichs mit den synen czu sicherunge des Cristenthums, so truwet wol unser homeister, das das uwer wylle sie, und der tag do gehalden mag werden mit mynner koste.
Item ist, das Wytowt uff dem tage nicht wil thun eyn moglichs, und das sich unser homeister scheiden wirt ane ende von em das got nicht gebe, so will unser homeister gerne gefollig syn aller bescheidenheit und getruwet uwer grosmecht[ikeit] also {S. 44} gros, was dy sampt mit unserm heilgen vater dem pabest und unsern herren den kurfursten dirkennet, das Wytowt thun sal czu sicherunge der heilgen cristenheit und das der orden blibe by synen rechten. Doran wil her gerne gevollig syn, und czu tagen wo dy bequemlich geleget werden, gerne will dy sinen dorczu senden czu vorhorn und czu vorliben dy ussproche der sicherunge.

Item uff die ander botschaft, alz von Sigsmund wegen, entputet uwer grosmecht[ikeit] unser homeister, das her nicht alleyne Sigsmund, sunder alle sine gefangen halde czu troste und czu sicherunge der heilgen cristenheit. Und was her mit den gutes geschaffen mag und im moglich und erlichen ist czu thun, des will her allecziet gerne gevollig syn uwir allirdurchluchtikeit. Sunder uwer grosmecht[ikeit] wisse, das Wytowt sinen bruder Sigsmund gelasen hat dem orden czu getruwer hant und in giesels wyse, und czu dem ersten das man im desto bas getruwen mochte. Item so hild unser homeister und der orden herczogen Wytowt mit vil syner frunde herczogen und bayoren eczlich yor und leget off yn grose koste, dy Wytowt phlichtig ist dem orden noch czu beczalen, nemlich gelegene schulde.
Item so helt unser homeister den selbigen Sigsmund umb mancherley globde, dy herczog Wytowt gethan hat dem orden.
Item das der orden bynnen der cziet desto bas und schirer moge wedirfaren recht und sicherunge.
Item mit eren mag unser homeister nymands gegeben, wen her in helt czu getruwer hant, is geschege denne mit willen herczogen Wytowt, der yn gelasen hat dem orden.

Item czum letczten yn teidingen das bewart ist von herczog Wytowt, so der heilgen cristenheit und dem orden geschiet sicherunge yn buwunge eczlicher vesten, so sal unser homeister fry und ledig ym wider gebin synen bruder Sigsmund.
Item boben alle sache, ist das unser homeister sich scheidet von dem tage ane ende mit Wytowt, also das her nicht wil gnuk thun an sicherunge der cristenheit, noch glich pflegen dem orden, und dornoch unser homeister wirt horen Wytowts willen, dor ober truwet allirdurchlucter, das ir mogt losen mit im unsere herren, dy noch gefangen synt von den Turken. Und der orden das vorgewisset werde czu eyner genuge, das Sigsmund an keyner hant anders komen sal wen alleyne czu der vorgeschriben losunge. Und ouch das dem orden glichewol widerfare recht von Wytowt, so wil her von herczen gerne, denne so dy losunge geschen sal, gebin uns syner haft {S. 45} Sigsmund. Wer is ouch das dy losunge mit im mit nichte mochte czugehn, das dy yo Sigsmund dy wile blibe dem orden.