PrUB, JS 349

{Überlieferung}
B = OF 2c, p. 150 [olim Registrant des Hochmeisters Konrad von Jungingen, Nro. II, fol. 71v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 63.

{Diplomatische Erörterung des Stücks}
Gleichzeitige Abschrift, Papier.

Irluchten fursten und lieben herren.
Euwer herlichkeit wir thun czu wissen, daz als hewer im herbeste uns czu wissen wart, als die seerouber von der see abczogen, das sie sich in euwern tiff und havene, Pene genant, enthalden haben desen wynter. Daz uch czugehoret, alz uns gesaget ist, die uff unsers ordens  und des gemeynen kowfmans schaden uff der see gewest synt, uns allen grosen schaden czugeczogen haben, alz wir uch vor geschriben haben. Des wir doch uwer grosmechtikeit nicht hetten czugetruwet, daz ir die selben seerouber, unsere und des gemeynen kowfmans vynde, soldet geheget haben, und nu haben wir von nuwes vernomen. Und als uns gesaget ist, wy daz die seerowber sich aber meynen in die see czu legen, uns und den gemeynen kowfman czu beschedigen, die us euwerm tife und dorch euwer land uff die see meynen czu komen.
Hirumb, lieben herren, bitten wir euwer herlichkeit mit luterm flize, daz ir eyn solches nicht wellet gestaten, durch got und unsers ordens willen. Und seet an die truwe, die der orden by uch gethan hat und wir noch allewege gereit sient, uch behegelichkeit czu dirczeigen noch unserm vermogen, und lasset uns, noch den gemeynen kowfman us euwerm tife und lande nicht beschedigen. Daz wellen wir umb uwer liebe gerne vordynen, und bitten dis briefes eyn antwerte, daz wir uns dornoch mogen richten.
Geben czu Marienburg am Sontag Invocavit [1398].