PrUB, JS 347

{Überlieferung}
B = OF 2c, p. 151-53 [olim Registrant des Hochmeisters Konrad von Jungingen, Nro. II, fol. 72r-73r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 65-67.

{Diplomatische Erörterung des Stücks}
Gleichzeitige Abschrift, Papier.

Czu dem ersten gedenket, vorbrengende, wy das Littower land und Ruscheland, echter des cristen globins, alczu sere sich sterken mit hulfe und rate des koniges von Polan, der dye hat gesterket mit pferden, harnasch, wopen, werkmeister etc. und hutes tages sterket, alczo daz der orden alczu swer hat iczunt czu halden das orloy der heiligen cristenheit weder die ungelowbigen, wen sie allirleye offsecze des orloys werden gelart. Ouch dy das cristenliche orloy vordern solden, die hynderns und vorbiten die ritterfart durch ir land czu czihen als der von Polan.
Item wy Wytawte obirster furste der Littowen und Ruzsen vor sich dicke hat dirboten, her welde gerne sich seczen dem cristenthum mit allem sienem lande. Die worheit der orden noch ny an im hat funden, wen is geschach, das czu iare der herre homeister hilde eyn tag mit im, und dornoch ouch etliche syner gebitiger, do her vorsichert solde haben der heiligen cristenheit mit gysel und eyden, der her keyns thun wolde.
Item wy der obirste marschalk mit etlichen andern gebitigern hilden mit Wytawten eynen tag, uff dem geteydinget wurde nemeliche artikel uff beyde sieten vorliebet und beschreben, under andern artikeln czu sicherunge der heyligen cristenheit der artikel vorliebet wart, das Wytawte uff dem tage der czusamnekomung des herren homeisters und siener her solde gelowbet haben, was andere cristenfursten pflichtig weren czu thun dem heyligen Romischen riche, das solde her ouch thun. Den artikel wederwarff her und wolde doran mitnichte, und das machet der konig von Polan, als wir vornemen, der sich ouch doweder saczet, us dem man prufen mag die swacheit sienes gelowbens und alzo wol des koniges von Polan.
Item das der orden in Littower land und Russen des cristens gelowbens keyne besserunge sporet, wen ir alczu wenig in cristenlicher e getowfet werden, sunder gar vil werfen sich czu der Ruschen e, die mit nicht gehorsam sien wellen weder der heiligen kirchen noch dem heyligen Romischen riche.
Item wy der konig von Polan vorhengit, daz alle die Rusche land, die von alders gehort haben dem riche czu Polan ader ouch ken Ungern, was darynne vesten und huser synt, die hat her besaczet und beseczet mit houbtluten die Russen sient {S. 66} und nicht cristen. Und der orden furchtet, ab icht geschege an deme konige von Polan, das Wytawte aller der land deste mechtiger wurde, und ouch domethe des riches czu Polan, dem gliche man furchtet, das ouch der konig von Polan, ab her solde mit rechte abtretyn dem riche, das her mit semelichen offseczen wil dye land behalden czu vorterpnis der heyligen cristenheit, beyde czu Polan und anderswo.
Item wy Wytawte als man vornomen hat, sich sere trostet der Torken und Tattern, und ouch der konig von Polan. Und meynen den orden mit czu drengen, und nicht alleyne den, sunder ouch andere umsessen cristenland. Und der Tattirn hat Wytawte vil czu im geczogen, mit den her czu iare in dem somer wolde obirczogen haben den orden, und ouch der konig von Polan, alz das offenbare ist. Und der konig von Polan darumme etlichen syner houbtluten entsaczet hat, die wol dirkenten daz vorterpnis der cristenlanden und wolden des nicht gestaten, us dem man kysen mag, das beyde der konig und Wytawte nicht suchen anders den vorterpnis der cristen lande.
Item wy der herre homeister hat vornomen heymelich, sunder noch nicht vorware, das der konig von Polan dornach stee und Wytawte, das sie die crone obir Littowerland und Ruscheland von unserm heyligen vater dem pabiste dirwerben wellen, daz her die geruche czu lehenen und czu eym konige bestetigen Wytawten obir die egeschreben lande, das got understee. Wen wo das geschege, so wurde an in slan eyn gros teyl der heyden und Russenland, wen sie sich trosten wurden, das der orden sy nymmer torfte heeren noch obirreyten noch mit neyme orloy sie storen ader anvertigen. Und alzo vil wurden sie mer in erem ungelowben gesterket und weder die heylige cristenheit, als sie worden haben eynen bestetigitten konig von der heyligen kirche. Wen der selbe Wytawte von anbegynne unstete ist gewest an worten, werken, an sienen briefen, als das offenbar ist, alzo vil gewonne her eyne besser stad syner untogunt. Dorumme, so duichtet unserm homeister gut, daz euwer gnade ouch schrebe an unsern heiligen vater, ab das worde geworben an im, das daz nicht geschege.
Item Wytawtis unstetikeit und ouch des koniges von Polan mogit ir ouch vorgeben und dirmanen unsere gnedige herren, das sie dorczu ernstlich gedenken. Anders wyr vorchten, das in korzir czeit eyn gros schade und leyt obergeen werde die heilige cristenheit, is sey denne, das is Got understee gnedeclich.
An der underwysunge ouch ir wol by uch habit, als is not thun wirt.