PrUB, JS 340

{Überlieferung}
B = OF 2c, p. 172-73 [olim Registrant des Hochmeisters Konrad von Jungingen, Nro. II, fol. 84v-85r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 72-73.

{Diplomatische Erörterung des Stücks}
Gleichzeitige Abschrift, Papier.

{Intitulatio} Wir bruder Conradt von Jungingen homeister deutschis ordens {Publicatio} thun kunt und offenbar allen den, czu welchir keginwortikeit desir brieff kumpt, {Narratio} das wir mit rate und willen unser mitgebiteger und der edilsten unsir stete gekoren und gesaczet habin unsere liben getruwen Arnoldt Hecht, ratman unsir stadt Danczik, und Arnoldt von Herferten, ratman unsir stadt Konigesberg, czu vulmechtigen houptluten und ammyralen aller der schiffe und lute, dy in der vlote in der gebunge disses briefes us unserm lande und hafenen von Pruessen gesegelt sint. Und haben in gegeben volle macht czu richten alle sachen, dy dar geschen in der selbin vlote und ouch czu gebruchende allis gerichtes, beide gros und cleyn.
{Dispositio} Hirumb, zo bitte wir alle unsere herren, konige, fursten, herczogen, grafen, frien, ritter, knechte, houptlute, burgermeister, richtere, amptlute und gemeynlich alle, czu welchir kegenwortikeit deser unser brieff kompth, das ir liben herren und frunde den vorgeschriben czweyn houptluten und ammyralen wellit vorderlich und behulfen syn czu dem vorgeschriben gerichte, das wir in mit craft dis brifes befolen haben, und sy doran nicht hindern, uff das die do in der vlote sint {S. 73} deste fredelicher leben und in gehorsam syn. Das wir lieben herren und frunde umb euwir herlichkeit und fruntschaft gerne noch unserm mogen vorschulden wellen.
{Corroboratio} Des czu orkunde und geczugnisse habin wir unser ingesegel an dissen brieff lassen hangen.
{Datierung} Gegebin czu Grebin uff unserm hofe am Frytage nehst nach Petri und Pauli der heiligen czwelfboten in den iaren unsers herren tusent drihundirt im acht und neunczigsten jare.