PrUB, JS 317

{Überlieferung}
B = OF 2c, p. 241-42 [olim Registrant des Hochmeisters Konrad von Jungingen, Nro. II, fol. 111r-v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 96-97.

{Diplomatische Erörterung des Stücks}
Gleichzeitige Abschrift, Papier.

Eynfeldige befelunge und willige dinste etc.
Allirdurchluchste, grosmechtige gnedige frauwe. Euwir briefe uns lectzte gesant wir wirdiclich offgenomen und ouch dorynne euwir vorklerte meynunge wol habin vornomen, und euwir durchluchte dirbytunge uns czu lybe gunst und fruntschafft wir uns begerlichin freuwen. Und getruwen euwir und unsers gnedigen herren euwirs sones allirdurchluchtikeit, das wir mit dem ganczen unserm orden anders nicht vorscholden noch mit vorsatczt bewisen buessen redelichen notsachen, wen das wir uns czu den und in den mit flieze enthalden wellen, und als euwir durchluchte gute berurte dy sache von Gotland und der Stad Wysbu etc. Gnediger frauwe, was doran geschen ist und do by unser selige gute meynunge, wir hoffen, das uns die nymand vorkeren kan mit redelichkeit, wenn euwir ryche, frede, selikeit und wolfaren doczu unsers ordens lande nicht alleyne, sunder des gemeynen kowfmans sichirheit und beschirmunge uswysen, das unser meynunge von an begyn und noch hutes tages gut is.
Vortme, allirdurchste gnedige frauwe, als euwir grosmechtikeit begerende ist unser bothen czwisschen Ostern euwir wysheit czu underwysen unser meynunge, so geruche euwir durchluchtikeit czu wissen, das wir unsir bothen, so wir erste mogen, gerne usrichten wellen. Wenn is e nicht wol gescheen kann, dorumb, wenn wir unser gebitiger dy itczunt in der reyse synt uff dy heidenschafft, nicht woll habin konnen der willen und wissen wir doczu bedorfen.
Ouch so muesse wir vor underricht werden von unserm sachwalden off dy antwert euwers briefes, wenn sunder in uns nicht moglich ist, mit eren eine antwert czu gebin euwer grosmechtikeit. Wenn wir yo von synentwegen czu getruwer handt das selbige land und stad inne halden und, do dy unsern das landt und stad vorgenant ynnomen mit grosser koste und czerunge, musten das vorbrifen, als der brif uswiset. Dorum, so hoffe wir groslich czu euwir und unsers gnedigen herren euwirs sones allirdurchluchtikeit, das ir uns eynen semlichen offczog noch eynen lengern nicht vorkeret und so uns euwir grosmechtige durchluchtikeit gonst, lybe und fruntschaft so myldiclich anbuet, ungerne von uns nemen geruchet wen das uns mogelich und erlich ist czu thun. Gnedige frauwe gebytt an uns und dy unsern als an euwir andechtige bether czu Gote.
Gegeben czum Sthume an der Mittwoche noch Scolastice virginis im XIIII^{c a)} jare.

^a) Im Text als XCIIII.