PrUB, JS 316

{Überlieferung}
B = OF 2c, p. 242 [olim Registrant des Hochmeisters Konrad von Jungingen, Nro. II, fol. 111v].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 97-98.

{Diplomatische Erörterung des Stücks}
Gleichzeitige Abschrift, Papier.

Eynfeldige befelunge etc.
Allirdurchluchster furste, grosmechtiger gnediger herre, uff euwern briff uns leczt gesant von des landes wegen Gotlandt und der stadt Wysbu und dornoch uff unsern briff gesant an unser frauwe dy konigynne czu Denemark mit inhaldunge euwirs briefes sy czu underrichten euwir grosmechtikeit meynunge: Dy selbe unser frauwe widder an uns hatt geschriben, vorderlich ire meynunge und keyn recht czu vorsprechinde. Ader, wo das gescheen sall, das usdruckt sy in erem briefe nicht, den wir hirinne euwir grosmechtikeit senden, und wen euwir allirdurchluchtikeit in euwern letczten briefe czu uns sich dirbeut, das wir euwir grosmechtikeit macht hetten czu dem rechte czu dirbyten und nicht dy wyse, wo und vor weme uns nicht fugete euwir grosmechtikeit rechtstellig czu machen ader imand do von czu schriben. Sunder nu euwir allirdurchluchste wysheit vornemen mag unser frauwen meynunge der koniginne, so thut das von euch selbin, wo und vor weme ir an das recht geen wellet mit ir. Und vortret uns ernstlichin, wenn sy uns dorumb ernstlich schribt und vordert das vorgenante land und stad von uns, schribinde und enthytende, das das land mit rechte ir czugehort und irem ryche.
Ouch so schribt, gnediger herre, uns euwern wysen rat, wy wir uns dorinne halden sollen, doran wir euwir allirdurchluchtikiet gevallen mogen und genug syn, und ouch doby keyns thun das uns mochte vorkart werden als eyn unrecht von imandes, wenn wir alle ding doran gethan habin nicht alleyne czu sunderlichin, sunder eyme gemeynen vromen der lande und des kowfmans. Das sehet an und vorsteet uns ernstlichin noch euwir briefe luet. Off unsern briff mit dem ingeslossen bete wir uns eyne unvorczogliche antwert, wenn wir dy vorheissen habin obir czu senden mit unserm bothen uff dese Ostern ader dornoch kurczlichin.
Datum czum Sthume an der Mittwoche noch Scolastice virginis im XIIII^c. jare.