PrUB, JS 289

{Überlieferung}
B = OF 3, p. 36 [olim Registrant des Hochmeisters Konrad von Jungingen, Nro. 1b, fol. 18].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 129.

{Diplomatische Erörterung des Stücks}
Gleichzeitige Abschrift, Papier.

Irluchter forste und herre.
Heynrich, desir bewiser unsers ordens bruder, hat von ewir wegen an uns geworben also von der losunge der unsern von beidenthalben. Dor off wir euch vor eyne antwert schriben, wellt ir uns die unsern off die hant geben bis czu offen tagen und uns denn wedir schriben off die selbe czit eynen nemelichen tag der losunge off eyne stat den euwren und den unsern bequeme noch alder gewonheit, do selbis welde wir euch die gefangen alsampt, die wir off die hant genomen hetten, weder antwerten ane allerley argelist und gefeer. Also ab irkeyner der unsern bynnen der czit der losunge entliffe und sich unsers landes vorczien welde, also das wir in nicht gestellen mochten, das wir vor eynen semelichen eyne gewonliche losunge teten, als man von alders getan hat. Und ab ouch irkeyner vorstorbe, das mans ouch mit deme hilde noch alder gewonheit. Und das ir uns des czuvor euwren vorsegilten briff sendt eynes sichern fredis acht tage vor dem tage der losunge und acht tage dornoch, so welden wir selbir off den tag komen ader die unsern dar senden mit alle den, die wir off dy hant nemen, eyne fruntliche losunge von irre wegen czu halden noch alder gewonheit. Was hir by euwir meynunge ist des begeren wir uns wedir eyne antwert czu vorschriben.
Gegeben off unserm huse Marienburg am Donirstage noch Sente Prisce Tage im XIIII^C und andern iare.