PrUB, JS 285

{Überlieferung}
B = OF 3, p. 84-85 [olim Registrant des Hochmeisters Konrad von Jungingen, Nro. 1b, fol. 39-40].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 133-35.

{Diplomatische Erörterung des Stücks}
Gleichzeitige Abschrift, Papier.

Einfeldige bevelunge etc.
Allerdurchluchster furste grosmechtiger gnediger herre, als wir euwer durchluchtikeit ufft und dicke schribende fleisseclich gebeten haben {S. 134} umb vortretunge des landes Gotland ken der allerdurchluchsten frawen konigine von Dennemark und sunderlich nu uffs leczte schreben, wie das von der frawen konigine und dem herren konige von Denemark und ouch von den Pomerschen herren und vom herczogen von Sleswig muntlich unsern scheffer ansprechende wir hertlich gemanet sint umb abetretunge desselbin landes czu Gotland. Und schriben ouch, wie wir des nicht enteten, so mosten sie iren frunden dorumb czu hulffe czien widder uns, eyn semlichs czu behaben. Grosmechtiger gnediger herre, do selbes schreibet euwer durchluchtikeit, als ir in vorcziten ufft und vil geschriben hatt, wie das euwer herlikeit bereyt were dorumb czu tagen czu komende etc. Mee, liber herre, hat dornach nicht gefolget, und ouch hat euwer gnade bis her nicht me doczu getan, aber der allerdurchluchsten frawen konigine und all den iren wil an der antwert nicht genugen, sunder ernstlichen uns schreiben, sie begern, das wir in eyne entliche antwert geben, ab wir in des landes czu Gotland wellen abetreten ader nicht.
Darumb, grosmechtiger besunder herre, euwer durchluchtikeit wir gancz begerlich bitten, das ir geruchet anczusehen die grosse und vil muwe und koste und fruntschaft, von uns geton, und sunderlich das uns nicht entfuget, mit dryn konigrichen und vil andern herren und fursten in eynen widderdrys und unmynne czu seczen von wegen des landes czu Gotland. Und ouch so welle wir uns mit nichte dorumb in eynen widderdrys seczen, und wellet uns, liber herre, noch luhe euwir brieffe das lant czu Gotland mit uskomunge und czu desser czit vor der frawen konigine und dem herren konige von Denemarken vortreten, und uns von irer ansproche freyen. Sunderlichen, grosmechtiger besunder herre, nu wir dirfunden haben, das euwer durchluchtikeit noch luthe euwir vorsegilten brieff bis czu desser czit nicht me dorczu getan hat, so haben wir unser sendeboten nu aber gesant an die gemeynen stete bey der sehe, ires rathes gebruchende von wegen des landes czu Gotland.
Dorumb bitten wir euwir durchluchtikeit, liber herre, das ir uns eyne entliche antwert gebet, ap euwir grosmecht[ikeit] uns das lant Gotlant ken der allerdurchluchten frawen konigine vortreten und freyen welle, und die selbe antwert beschreben gebit dessim brieffczeiger, der sie vortan brengen wirt an unser sendeboten und die gemeynen stete, also das wir der frawen konigine und den iren vortan eyne entliche antwert mit uskomunge geben mogen. Wand ire durchluchtikeit nicht lenger vorczog lyden wil und wir ouch ernstlichen meynen der sache eyn ende czu geben, und hoffen das euwir grosmecht[ikeit] nach luthe euwir brieffe uns doran nicht vorczien wirt, sunder eyne semliche entliche antwert geben werde, das wirs in mynne und fruntschaft vortan von uns brengen. Das wir ken euwir grosmecht[ikeit] gerne vordynen wellen, wo wir mogen.
Gegeben uff {S. 135} unserm hofe in der Scharffaw an der Mittewochen noch Sente Jorgen Tage im XIIII^C und andern iare.