PrUB, JS 240

{Überlieferung}
B = OF 3, p. 154. [olim Registrant des Hochmeisters Konrad von Jungingen, Nro. 1b, fol. 73].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, Nr. 169, S. 189.

{Diplomatische Erörterung des Stücks}
Gleichzeitige Abschrift, Papier.

Irluchter forste und besunder lieber here.
Euwerm brieff uns negest gesand inhaldende die entschuldunge, worumme ir czu deser czit uns keyne vorbriffunge habt getan, haben wir wol vornomen, und die botschaft, die euwer schriber an uns hat gebracht von euwir wegen als umb das gelobde, das ir uns habt getan von widdirkerunge unser greniczen, do von uns ouch unser schriber volkomene undirrichtunge hat getan, haben wir gutlich und fruntlich offgenomen, und haben dor inne euwern guten willen und begerunge, die ir czu unserm orden habt, wol dirkand. Und danken euch das gar fleiseclich, uns dorumme czu euwern begerungen bereit und willig dirbitende, nemelich den gutlichen worten und gelobden, an den wir gerne eyn gnuge haben wellen bis czu dem negesten tage, und den sunder czwifel glowben wellen
Ouch wellen wir Got den heren mit unserm orden demuticlich bitten, das hers von synen gnaden den armen cristen czu hulfe geruche also czu schicken, das ewiger frede und fruntschaft, als wir genczlich hoffen, czwisschen uns blibe. Und bitten euwir herlichkeit begerlich mit flise, das ir an wellet sehn unsern guten glowben und willen, den wir allewege czu euch gehabt haben, und off euwerm gelobde feste und stete bliben wellet und euch do von nymand keren noch wenden lasset, als wir jo gancz getruwen czu euch haben.
Gegeben off unserm huse Marienburg an der Mittwochen noch Purificacionis Marie im XIIII^C und vierden jore.