PrUB, JS-JL 53

Erwirdiger vater und liber herre.
Wir haben us dem hove zcu Rome von unsers ordens heymelichen und sunderlichin frunden vornomen, das euwer veterlichkeit an die heilige samenunge der cardinal und ouch euwer capittel mit euwern briven unsern orden swerlich berochtet hat, schribende das her solde berowbet haben die kirche zcu Ryge an slos, vesten und ouch an anderm gerete und ander vyl sachen yr berurt hat in euwern briven, das wir noch unser orden widder euch ny vordynet noch vorschult haben. Und were wol gewest ein gotlich recht, das ir uns vor dirmanet hett des rechten und gewarnet und hett vor uffgenomen unser entschuldung und sache, hett ir denne gehört etwas unrechtes und das wir nicht gehatt hetten rechte sache vor uns, so mocht ir denne dorumb geschriben haben und dennoch fruntlicher den yr getan hat.
Doch das wir euch underwisen kurczlichin die sache, so wisset do der alde erczbischoff und das meiste teill synes capittels czogen mit gutem willen unbetwungen sunder von eygenem uffsaccze us dem lande bynnen der zciet, als sie uffgenomen hatten eynen fredelichin tag zcu halden do selbist mit dem orden, und lyssen der kirchen vesten nicht alzo bewaret und bemannet, das der orden were sicher gewest, das sie icht komen weren an irer vynde hant und gewalt, wen sie gelegen sint den ungeloybigen, dorumb zo nam sie der orden yn, unserm heiligen vater dem pabiste zcu getruwer hant, und vorschreip sich sie nymande uffzcugebin wen im ader weme her vorsege. Und alzo ist is geschen, wen her ouch die renten bynnen der zciet hat uffgenomen, und nu von den gnaden unsers herren geschen ist eyne sotane wandelunge und voreynunge, der not gewest were vor vyl jaren, wen die land der kirchen und des ordens hetten bas zcu genomen, die vynde christi weren me geswecht, meynen und wellen, ap got wil, dozcu thun alzo vil noch unserem vormogen, das die kirche zcu Rige sal bliben bie allen irem rechte. Und sal nicht syn eyn vorterpnisse der kirchen, als ir geschriben hat, sunder ir dirfaren sollet, das sie zcunemen sal, als wir getruwen von tage zcu tage.
Dorumb zo bitte wir euwer veterlichkeit begerlichin, das ir semelicher brive nicht me sendet in den hoff ader andirswo, uns und unserm orden zcu schaden und zcu berochten, das wir ken euch wo wir mogen zcu allen zcieten gerne vorschulden wellen, {S. 93} und bitten uns ein anwert doruff zcu schriben mit desim boten.
{Datierung} Gegeben etc. im XCV jare in der Martirwochen ⁴⁾.
Des selben glich hat man ouch geschriben heren Gerhart bischoff zcu Lubicen und heren Gerhart bischove zcu Raczenburg und dem capittel zcu Hildesym und dem capittel zcu Raczenburg.