PrUB, JS-JL 45

Johann und Ulrich Herczogen czu Mekelburg.

Irluchten fursten und herren.
Wissed, daz wir euwern brieff wol haben vornomen, in dem ir uns umbilich und unmogelich hat entsaget. Wen alz wir hoffen, czu uns ir keyne redliche sache hat, worumme ir uns entsagen soldet, und hettet ir keyne sache, die redlichen und recht were wedir uns und unsern orden, ir het bilchen czuvor gehort unser entscholdigunge und wedirrede. Het wir denne der sachen uns nicht mit rechte vorantwert, so mochtet ir dabey gethan haben, was ir hettet gewolt. Sunder uns dunket, ir tut dem orden grose gewalt an semelicher entsagunge, wi die sachen sten czwischen dem herren bisschofe czu Darpte, der kirchen czu Rige und dem orden czu Liffland. Die wissed ir wol, ob ir die wissen wellet, wen sich der orden alczeit hat dirboten czu dem rechte und hutestages sich dirbutet, und der vorgenant herre bisschoff mit den sienen ym ny welden lasen genugen an dem rechte noch hutestages wil. Dorumb so wundert uns worumme ir uns hat entsaget. Ouch so ist der orden ny gewest wedir den von Stetyn ader wedir herren Albrecht euwern bruder alz weder ere vorder wedirsachen sunder alleyne wedir den herren bisschoff von Darpte, der do weys das recht und wil yo mit unrechter wise vorunrechten unsern orden. Wir hoffen wol, ir werdet uch bas dirkennen und semeliche gewalt nicht gevolgen.
{Datierung} Gegebin czu Marienburg am Sontag vor Valentini²⁾, anno domini XC septimo.

Dem glichen ist geschriben herren Baltczar und Johann gebrudern, Claus und Cristofern gebrudern, dy sich schriben herren czur Werle, den schreyb man edelen herren etc.