PrUB, JS-FS 78

[1392]. [o.O.]. {Regest}

{Regest}
{Regest}
Bericht über die Kriegshandlungen im Dobriner Land, die Verpfändung des Landes an des Deutschen Orden durch den Herzog von Oppeln und die Ansprüche des polnischen Königs auf das Land.

{Überlieferung}
B = OBA 496 [olim Schieblade 31, Nr. 31].

{Drucklegungen}
aus B: Codex Diplomaticus Prussicus, Urkundensammlung zur älteren Geschichte Preussens aus dem königl. Geheimen Archiv zu Königsberg nebst Regesten, hrg. Johannes Voigt, Bd. 4, Königsberg 1857 (ND Osnabrück 1965), S. 134-138.

{Regest}
JH I 496.

{Diplomatische Erörterung des Stücks}
Gleichzeitiger Entwurf auf Papier.

Von dem lande Dobrin deme orden czu getrwuer hant befolen

Is ist eyn herczog von Russen, der eyn erbe ist czum lande Dobrin und eyn geboren forste von Oplen, demselben herczogen wart der kunig czu Polan vast ungnedig und sienen czorn und ungunst groslich off en warff, also das her en us dem lande vortriben wolde und im das lant czu syner crone behalden wolde. Und sante dor yn mit grosser macht meynende das selbe lant in czu nemen do selbis nam her in eyn hus und besaczte das mit den synen und quam vor eyn ander hus das hatte der herczoge bestalt und besaczt, also das do selbis eyn houbtman was mit etlichen erbarn luten des selben landis, die das hus inne hatten und bewereten vor das legerten sich die von Polan mit irem houptmanne und ganczem heere und logen vor dem huse manche woche. Also das is en des herczogen lute vorhilden, das die von Polan des huese nicht gewynnen mochten.{S.135}
Item bynnen des als die Polan vor dem huse logen toten sie des ordens luten von Prussen grossen schaden und namen en ir gut und ir gelt wenne sie ken Dobryn czogen mit irre koufenschaft als sie mit den von Dobryn vil und mancherley geschefte hatten beide an gut und ouch an schult und ir gelt von den von Dobryn begerten czu haben. Do sandte der alde meister czu dem houptmanne von Polan der vor dem huse lag eynen syner pfleger, der sagte im von des meisters wegen, das her mit den synen die lute us Prussen unbeschediget czien lisse, welde her vor dem huse legen, das hers tete ane syner lute schaden und vorterpnisse und lys en bitten, das her den luten us Prussen das ire wedirschickte, das en genomen were. Der houptman karte sich an die rede nicht, also das der pfleger von im ane antwert muste czien.
Item do noch lissen is die von Polan nicht, wo sie des ordens lute obir quomen do beschedigeten sie sie und nomen en was sie hatten. Do sandte der alde meiste aber czu en etliche der synen, die an dem houptmanne begerten, das hers nicht gestatte, das des ordens lute also groslich schadehaftig worden und das man en das ire wedir gebe, welden sie do legen das die is teten ane iren schaden. Der houptman karte sich aber an die rede nicht, also das sie ouch von en ane antwert scheiden musten.
Item czum dritten mole sandte der alde meister czwene syner gebitiger mit etlichem volke czu dem selben houptmanne vor das hus, die an im eyne antwert vorhoren solden ap den synen vor ire schaden glich wedirfaren mochte die off keynen krig czu im reten. Do die lute von Polan dese lute ansichtig worden, do dirhuben sich die selben vor dem huse kegen en mit irem gewere, do sie en also nahen quamen, do sie sie besogen, das ir etwas vil was, do karten sie sich wedir umme und goben die flucht von dem huse, nymand slug sie nymand iagte sie, also das sie ane allen schaden von dannen czogen.
Item do reten die gebitiger vor das hus, do quam der houptman mit den luten von dem huse czu en her ap und bat die gebitiger, das sie das hus innemen und befredten her wolde czu dem herczogen syme herren ryten und en besprechen wie hers mete halden solde. Do antwerten im die gebitiger, sie weren nicht dar komen umb des wille das sie das hus innemen welden, sie weren do hen komen das sie an dem houptmanne der vor dem huse lag eyne antwert von ires homeisters wegen vorhoren wolden, ap den iren ir schade mochte offgericht werden und eyn gliches do vor gescheen. Der houptman antwerte in sprechende welde sie das hus nicht innemen do welde her weg ryten und das hus wusten lassen steen, her mochte noch welde lenger nicht doroffe bliben noch is behalden.
Item als die gebitiger das von im vornomen, das her weg ryten wolde und das {S.136} hus wuste lassen legen, besorgten sie sich wol. Wurde das hus wuste legen, das lichte fremde das hus innemen wurden und beide den von Polan und ouch dem orden grossen schaden czuczien wurden und umb des wille undirwunden sie sich des huses und besaczten das mit den iren bis czu des herczogen czukomft. Und bynnen des als der houptman czu dem herczogen reit hatten die von Polan das gancze lant inne und die von Prussen nymandes leidegeten noch bekommirten in keynerley wise sundir alleyne das hus inne hilden.
Item do noch als sie das hus etliche czit inne hilden, quam der herczoge der eyn erbe des landes Dobryn was czu dem homeister begerlichen in und den orden bittende, das die im eyne etlich summa geldis off das hus das sie inne hatten und off das lant Dobryn, das sien erbe was, lyen welden und is also czu getruwer hant hilden bis her wedir loesen mochte. Des wart der homeister mit synen gebitigern czu rate und wurden eyns mit im umb das selbe lant und legen im dor off eyne etliche summa geldes, wedir abeczu loesen wenne her mochte. Das wart also czwisschen en vorbrifft und vorschreben, das der orden das selbe lant Dobryn gancz mit alle synen [...]^a) gen innemen solde also lange bis hers wedir von dem orden loesete.
Item als die vorbriffunge von beiden syten gescheen was do vorbotte des herczog die lute des ganczen landes Dobryn vor in und legete in vor von der briffelunge desselben landes dem orden und das her sie an den homeister wisen welde mechticlich, das sie im holden solden und dem orden und al das thun, das sie im getan hetten, als lange bis her das lant wedir czu im loesen mochte. Des wurden die lute des selben landes gemeynlich und mitenander eyns und holdten dem homeister und dem orden unbetwungen mit gutem wolbedachtem willen im und dem orden undirtan czu sien, in aller wise als sie irem rechten erbherren gewest weren also wurden sie von dem orden offgenomen.
Item als der homeister und der orden das lant ingenomen hatten und en das gancze lant geholdet hatte, do woren die von Polan noch in Dobryn off eyme geringen huse das sie inne hatten. Do sandte der homeister etliche der synen czu dem houptmanne des selben huses und lys im sagen, das her das gancze lant Dobryn in beffelunge hette czu getrwuer hant und im die lute geholdt hetten, das her das selbe hus ouch offgebe fredelich her ap mit den die by im weren cziende und is nicht lenger inne hilde. Der houptman karte sich an die rede nicht und wolde von dem huse nicht czien, also das die boten von im czogen und in lissen off dem huse.
Item als der houptman von dem huse nicht czien wolde, do samdte der homeister etliche gebitiger mit iren luten vor das selbe hus, das sie is innemen solden. Do sie {S. 137} vor das hus quomen und der houptman sach, das her das selbe hus nicht lenger halden mochte, do gab her das hus off und czog ap mit den die mit im do woren mit iren pferden und mit alle irre habe fredelich von dannen, das nymant von en geslagen noch das syne genomen wart noch der ordens lute keynen von den selben leydegeten und in keynerley wise beschedigeten. Also hat der Orden das selbe lant hutes tage in befelunge czu getrwuer hant.
Item do noch etliche czit als der orden das selbe landt Dobryn czu getruwer hant inne gehalden hatte, do vorderte der konig czu Polan mit den synen das lant von dem orden. Sprechende wie das is czu dem konigriche czu Polan gehorte und begerte, das im der orden des selben landes abetreten welde. Do wart im von dem orden geantwert, wie das in das selbe lant czu getruwer hant von dem herczogen befolen were und sich mit dem herczogen also vorschreben hetten, das sie des landes ane synen wissen und willen nymandes abetreten welden. Ouch so sulde is der herczog dem orden fryen und vortreten vor allir manunge und ansproche. Ouch antwerte der orden das sie dem herczogen schriben welden, das her friete und vortrete den orden ken dem konige von Polan, der von en das slelbe lant vorderte und manete.
Dornoch schreib der homeister dem herczogen czu Opel, en bittende das her im das lant fryete ken dem von Polan, das der orden von des selben landes wegen ungemanet blebe. Des dirbott sich der herczog czu allem rechte wie das her bewisunge do von thun welde, das das selbe lant sien rechte erbe were und begerte an deme konige czu Polan und an den synen, das man im das recht mit den forsten bestelte, her welde do hen syne bewisunge und briffe brenegen. Is queme im czu schaden ader czu fromen und bewisen aldo, das her eyn recht erbe czu dem lande were. In sulcher wise hat her sich offte dirboten und noch tegellich dirbuit syne bewisunge do czu thun und bis her noch nymand von im uffnemen wolde die selbe syne bewisunge.
Obir das hat sich der orden dirboten ken dem von Polan und ken keyme iclichen andern, der das lant manende ist noch tegelich dirbuetet, wer in ir geldt wedir geben wil [...]^a) sie dem herczogen off das [...]^a) das lant czu getruwer hant [...]^a) und en ouch offrichte das gelt, das sie off das lant gelegen haben deme wil der orden gerne ane wedirrede des landes abetreten, adir ane des herczogen wille der is en czu getrwuer hant befolen hat, so mag der orden mit eren des landes nymand abetreten noch deme als sie sich beide site vorschreben haben.
Ouch so czuyt im der orden des selben landes nicht czu eyme erbe sundir das is im alleyne czu getruwer hant befolen ist, und eyme idermanne gerne abetreten wil {S.138} der sich do czu mit rechte czien wil. Doch das im gnug do vor geschee in sulcher wise als vorgeschreben stet, das hers mit eren udn mit gelympe thun mag.

Textkritische Anmerkungen
^a) Lücke in der Textvorlage.

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/js-fs/js-fs78.htm) und Datum der Einsichtnahme; (2) im Druck: PrUB, JS-FS 78 ([1392]. [o.O.].)
Bearbeitungsstand: Text eingegeben (29. Juli 2003 Frauke Schmitz) – Datum überprüft (29. Juli 2003 Frauke Schmitz) – Text mit PrUB oder sonst Druck kollationiert (29. Juli 2003 Frauke Schmitz) – Text mit Or. kollationiert () – äußere Merkmale beschrieben ()

Datum der Erstanlage: Dienstag, den 29. Juli 2003 — Letzte Änderung: 8. November 2004 von Jürgen Sarnowsky (für ein korrekt adressiertes E-Post-Formular meinen Namen anklicken!)

Zurück zur Hamburger Homepage / zurück zur Regestenliste für 1392.