PrUB, JS-FS 104

1396 September 10. Frankfurt.

{Regest}
Die Gebietiger der Ordensballeien im Reich an Hochmeister [Konrad von Jungingen]: berichten über den Tod des Deutschmeisters Johann von Ketze und die Wahl des Landkomturs von Franken, Konrad von Egloffstein, zu seinem Nachfolger; bitten um die Bestätigung Egloffsteins als Deutschmeister.

{Überlieferung}
A = Pergament-Urkunden, Schieblade 98, Nr. 3.

{Regest}
JH II 1338.

{Drucklegungen}
aus A: Codex Diplomaticus Prussicus, Urkundensammlung zur älteren Geschichte Preussens aus dem königl. Geheimen Archiv zu Königsberg nebst Regesten, hrg. Johannes Voigt, Bd. 4, Königsberg 1857 (ND Osnabrück 1965), S. 179-180.

{Diplomatische Erörterung des Stücks}
Originalurkunde mit Resten von vier Siegeln.

Unsere willige gehorsam mit innigem gebete und abe wir icht gutes vormochten zu unserm herren Gote allezyt zuvor.
Gnediger lieber herr homeister.

Wir die nachgeschriben gebietger und brudere zu Dutschenlanden begeren uch und uwere gebietgere zu wissen, das bruder Johann von Ketze unser meister zu Dutschenlanden was von Gotes verhenkniss verfarhen und verscheidern ist uff den nehestern Maintag nach Sant Jacobs Dag¹⁾ dem unser herre Got gnedig sy und hait ein selich verstanden kristelich ende genomen also das yme alle cristeliche recht geschehen sint zu Ellingen, da er auch begraben lyt.

Des han wir ein gespreche gehalten darnach uff den nehesten Sontag nach unser Lieben Frauen dag als sy geboren wart²⁾ zu Franckfort da syn wir allesament einmutenclichen zu rate worden und haben erwelt bruder Conraden von Egloffsteine lanthcommentur zu Franken zu eime zukünftigen gebietgere und haben das genomen und nemens auch uff Got und uff unsern orden das wir zu dieser zyt keinen besseren darzu enwissen und hoffen und getruwen das es Gote und unser Lieben Frauwen lobelich und dem orden nützelich syn sulle und meinen und hoffen mit Gotes und unser Lieben Frauwen hilffe uns woil mit yme zu behelffen.

Davon bitten wir uwere gnade und auch uwere gebietgere demutenclich das ir uns denselben erwelten bruder Conrait vom Egloffsteine lanthcommentur ytzunt zu Franken geben und bestetigen wullent zu eime gebietgere zu Dutschenlanden want ir dem orden und dem gebiete, als wir hoffen zumail wol daran duet, und syn wir diese hernachgeschreben gebietgere und brudere zu dem gespreche und in der walunge gewest bruder Albrecht von Witzleuben, lanthcommentur {S.180} zu Thüringen, bruder Conrait von Beldersheim, commentur zu Marcpurg, bruder Reinart von Husen, lanthcommentur zu den Biessen, bruder Conrait Kuchmeister, lanthcommentur zu Lothringen, bruder Herman von Brandelicht, lanthcommentur zu Westphalen, bruder Ludowich grave vonWertheim, commentur zu Nürenberg, bruder Gotfrid, truchsecz commentur zu Mergentheim, bruder Johan von Hayne, commentur zu Franckfort, bruder Dietherich von Fenyngen, commentur zu Wyssenburg, bruder Friederich von Lybsberg, commentur zu Werde, bruder Wolff vom Urbach, commentur zu Brothfelden, bruder Friederich von Bremssbach, commentur zu Heilpronne, bruder Friederich Holtschuwer, spitalmeister zu Nuremberg, bruder Rudiger von Dulken, spitalmeister zu Brothfelden, bruder Jacob von Triere des meisters seligen capplain und han wir sementlich und einmutenclich gesant zu uwern gnaden und zu uwern gebietgern den ersamen geistlichen bruder Albrecht von Witzleuben, lanthcommentur zu Thuringen diese botschaft zu werben und zu vollenden. Der auch uwern gnaden selber wol sagen sal, was ir in diesen sachen von yme begerende syt und auch wie und in welchermaisen wie des gebietes sygel behalten haben versigelt und beslossen in dem trysor zu Mergentheim und nit zu uwern gnaden geschickt von unfrids wegen der leider groiss in allen landen ist.

Auch gnediger herre homeister wart dem lanthcommentur von Utricht verschrieben zu dem obgeschrieben gespreche zu komen der en ist nit komen, abe das crankeit scholt sy abe des crieges der ytzunt in Fryeselant ist das enwissen wir nit.

Dieser sachen zu urkunde han wir, der lanthcommentur zu Thuringen, commentur zu Martpurg, lanthcommentur zu den Biessen, lanthcommentur zu Lothringen, lanthcommentur zu Westphale, commentur zu Megentheim unsere ampte ingesigel an diesen brieff gehenckt.

Und wir der commentur zu Nurenberg, commentur zu Franckfort, commentur zu Wyssenburg, commentur zu Werde, commentur zu Brothfelden, commentur zu Heilpronne, spitalmeister zu Nurenberg, spitalmeister zu Brothfelden und des meisters seligen capplain gebruchen der obgeschrieben gebietgere ingesiegele in diesen sachen von bresthalff unser ingesiegele.

Diese brieff wart geben zu Franckfort uff den Sontag nach unser Lieber Frauwen Dag als sy geborn wart do man zalte nach Cristi geburte drüczienhondert und sess und nuyntzig jare.³⁾

Inhaltliche Anmerkungen
¹⁾ 1396 Juli 31.
²⁾ 1396 September 10.
.

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/js-fs/js-fs104.htm) und Datum der Einsichtnahme; (2) im Druck: PrUB, JS-FS 104 (1396 September 10. Frankfurt.)
Bearbeitungsstand: Text eingegeben (31. Juli 2003 Frauke Schmitz) – Datum überprüft (31. Juli 2003 Frauke Schmitz) – Text mit PrUB oder sonst Druck kollationiert (31. Juli 2003 Frauke Schmitz) – Text mit Or. kollationiert () – äußere Merkmale beschrieben ()

Datum der Erstanlage: Donnerstag, den 31. Juli 2003 — Letzte Änderung: 1. Februar 2005 von Jürgen Sarnowsky

Zurück zur Hamburger Homepage / zurück zur Regestenliste für 1396.