PrUB, AMR 1

{Überlieferung}
B = OBA 16495.

{Drucklegungen}
---

Regest
JH I 16495.

{Diplomatische Erörterung des Stücks}
Abschrift aus dem Ordensbriefarchiv, Papier.

Erwirdigster herre, mein underthenig willig dinst und was ich guts vermagk ewer gnaden mit gantzem willen stets zuvoran berit. Gnediger here hoemeister, mich hat warlich angelangt, hab auch des eigentlich wissen, das ewer gnaden vorfare der von Plauen hoemeister unseres ordenns seleger gedencnuß dem Erwirdigen in Gott vatter hern Dietrichen bischoven zu Samland zu der zeit als er anfangs zu eyn procurator im hoff zu Rome angenommen und gekorn wurde, ein mercklich zale vast gutte und kostliche bücher von unnsers ordenns liberie zu Tapiaw zugewandt, die der gemelt here bischoff mit ime im hoff zu Rome gefürt hat, die als mir myn kuntschafft sagt, vast verkauft und verandert seyn sollen, das schreib ich ewer gnaden darumb das ir auch etlichen nach forschung darnach habt umb deßwilln, ob man doch noch irgent heynnach können und die widder zubringen moht, damit unnser ordenn nicht gantz darumb keme, das wolle ewer gnaden zum besten van mir versteen. Datum Horneck an sant Jacobs tag angelici anno etc. LXXIIIImo.

Meister deutschs ordenns inn deutschen und welschen lannden.