PrUB1478.11.23

[...].

[Bayzens Sohn Nikolaus] sol der bischtumer dirbietunge der konigl. maiestat anbrengen, die her Byely Jhan allis ouszslieth und nicht will von en uffnemen, das unns denn gar sweer ist zcuvor[ne]men, von weme wir das haben, wenn wir wol möchten beyde mit den bischtümern und ouch mit dem orden czufride komen. Sunder alse ousz des herrn bischoffis vonr Coya anthwort den czween herren czu em gesant gegeben vornemen konnen, das die dinstlewte alhye im lande den wynter obir bleiben sullen, uns besorgen die sachen sich gar wunderlich dirlowffen werden und mit dem orden, so es anders nicht undirnommen wirt, zcu offenbarem kriege komme, wenn en gar merglicher schade und zcugrieffe geschen sey, und noch tagteglichen geschenn, und das sie vom Brunsberge uffgebrochen seyn, sie dortczu die noth und kommer futterunge halben gedrangt hot, die sie doumblang vorbrant und czunichte gemacht haben, und dorte so sie ictzund legen, ouch desgleichen thun wellen, und zcum leczsten angreyffen werden, wo sie ichtis vinden.

Werlichen, lieben herren, es ist vil gethan, das das [arm lant]^a)also iomerglichen sal vorheret und vorterbet werden ane irkeyne schold. Her Tungen, der wil weychen, das denn unsers allirgnedigsten herrn konigs beger yh und yh gewest ist, und her mag nu nicht geleytet werden, das her wegczöge; die bischtumer wellen widder bey unsern [...] konig und seyner gnaden lande und stete treten und seyner gnade allen willen thun, das mag en nicht widderfaren, und darobir sal das [arm lant]^a) also unbarmhercziglich vorterbet werden. Unns bedunckt, das sie sich in den sachen genug dirboten haben, sunder der bischoff will seynen willen haben, Gott gebe, das hers dadurch gut mache.

Stuhm St. Clementis 78.

[Nachschrift: ...] Welde der almechtige Gott noch seyne gnade geben, das die sachen und der unvorwintliche vorterb disses armen landes mochten widderwant und undirnomen werden uff derselbigen zcukunftigen tagefarth. Wenn wie deme ouch do also nicht geschiet, wissen wir nicht meh guttis dorusz zcu hoffen. [...] Wir sweigen denn, was forbas wirt nochfolghen, so sie den winter obir im lande bleiben sullen.